მოსწავლეებმა ამ დღესთან დაკავშირებით, საკუთარი შეხედულებები დააფიქსირეს. თქვეს, რა იციან დაუნის სინდრომზე, ზოგადად გამოთქვეს საკუთარი აზრი ინკლუზიური განათლების კუთხით. ყურადღება გაამახვილეს იმაზე, რომ საზოგადოებაში მცდარი შეხედულებები და არსებული სტიგმები უნდა მოისპოს. მათი თქმით, ყველა ადამიანს უნდა შეეძლოს მისგან განსხვავებული ადამიანის მიღება. გარდა ამისა, ბავშვებმა, სპეციალური საგანმანათლებლო საჭიროების მქონე მოსწავლეებთან ერთად, სიმბოლურად, „ჭრელი ხელები“ მოხატეს. 

კვირეულის ფარგლებში, აქტივობები სკოლაში სპეციალური მასწავლებლის, ანნა ჩაფიძის ინიციატივითაც განხორციელდა. მან, თემის გათვალისწინებით, მოსწავლეებსა და პედაგოგებთან მინი ლექცია ჩაატარა. აქტივობის მიზანი, დაუნის სინდრომის მქონე ადამიანთა მიმართ საზოგადოების მხარდაჭერის გაზრდა და ცნობიერების ამაღლება გახლდათ. კლასებში კი გაიმართა დისკუსია შემდეგი საკითხებზე: თუ რა სახის გამოწვევების წინაშე დგას დაუნის სინდრომის მქონე ბავშვი, მისი ოჯახი და საზოგადოება? რა გავრცელებული მითები შეინიშნება და როგორია რეალობა დაუნის სინდრომის მქონე მოსწავლეების ინტეგრაციისას სასწავლო პროცესში? რა არის შესაცვლელი, როგორ შეგვიძლია შევცვალოთ?

მოსწავლეებმა გამოთქვეს თავიანთი მოსაზრებები, გამოკვეთეს, რა იცოდნენ და რა გაიგეს დაუნის სინდრომთან დაკავშირებით, რას განახორციელებენ და როგორ შეუწყობენ ხელს, როგორ დაეხმარებიან დაუნის სინდრომის მქონე მეგობრებს საზოგადოებასთან ინტეგრაციაში, სწავლასა და ყოფა-ცხოვრებაში.

„ამ დღის აღნიშვნის მთავარი იდეა იმაშია, რომ რაც შეიძლება მეტ ადამიანს ჰქონდეს ინფორმაცია დაუნის სინდრომზე, იცოდეს იმის შესახებ, რომ ამ ადამიანებს, ისეთივე უფლებები აქვთ, როგორც სხვებს და მათი საზოგადოებაში ინტეგრირების ხელშეწყობა, უფლებების დაცვა ჩვენი მნიშვნელოვანი ამოცანა და სასიკეთო საქმეა.

სპეციალურმა პედაგოგმა ასევე ისაუბრა სხვადასხვა აქტუალურ საკითხებზე - რა უნდა გაკეთდეს, რომ დაუნის სინდრომის მქონე მოსწავლეებმა მიიღონ ცოდნა აკადემიურ და სოციალურ უნარებზე ორიენტირებული სასწავლო პროგრამის მეშვეობით, ჩართულნი იყვნენ განათლების უწყვეტ პროცესში, სრულფასოვანი მონაწილეობა მიიღონ სკოლასა და საზოგადოებრივი ცხოვრების ნებისმიერ ასპექტში; თავი იგრძნონ დაფასებულად, მაქსიმალურად განავითარონ საკუთარი პოტენციალი.

შეხვედრის დასასრულს, სპეციალურმა მასწავლებელმა, ქალბატონმა ანამ აღნიშნულ თემატიკასთან დაკავშირებით დამსწრე საზოგადოებას დაურიგა საინფორმაციო ბარათები“,-გვიყვებიან სკოლაში.

იხილეთ ფოტოები: