მარნეულის მუნიციპალიტეტის, სოფელ ბაითალოს საჯარო სკოლის ნურადდინ აბბასოვი, ჩვენთან საუბრისას აცხადებს, რომ ისინი მზად არიან, დიდი სიყვარულით შეხვდნენ პირველკლასელებს. რაც შეეხება მოლოდინს, ბატონი ნურადინის თქმით, 15 პირველკლასელის მიღება შეუძლიათ, თუმცა არსებული მონაცემებით, მხოლოდ 6 ბავშვს ელიან.

 

„სამწუხაროა, რომ მოსწავლეთა კონტინგენტი ნელ-ნელა იკლებს. სკოლას 15 პირველკლასელის მიღების საშუალება აქვს და 6-ს ველოდებით... სკოლა მზადაა ყველაზე უმცროსი მოსწავლეების დასახვედრად - ისინი პროფესიონალი მასწავლებლების დამსახურებით, კარგად ისწავლიან და ბევრ წარმატებას მიაღწევენ ცხოვრების სხვადასხვა ეტაპზე“, - აღნიშნა ბაითალოს საჯარო სკოლის ლიდერმა.

 

ხუთ პირველკლასელს ელოდებიან დმანისის მუნიციპალიტეტის ბაზაქლოს საჯარო სკოლაში, თუმცა როგორც დირექტორი, მაია ამიროვა ჩვენთან საუბრისას აცხადებს, ეს მონაცემი სავარაუდოდ შეიცვლება: „ჯერჯერობით მხოლოდ 5 პირველკლასელს ველით... მოგეხსენებათ, რეგისტრაცია ჯერ არ დასრულებულა და აქედან გამომდინარე, გვაქვს მოლოდინი, რომ ეს მაჩვენებელი შეიცვლება“.

 

მით უმეტეს, გასათვალისწინებელია, რომ სკოლას 10 პირველკლასელის მიღების შესაძლებლობა აქვს.

 

„მთავარია, რომ ბავშვებს დახვდებიან საოცარი, მოსიყვარულე, პროფესიონალი მასწავლებლები. ჩვენი პირველკლასელები უზრუნველყოფილნი იქნებიან მატერიალურ-ტექნიკური ბაზით და მიიღებენ საფუძვლიან განათლებას“, - დასძინა ბაზაქლოს საჯარო სკოლის ხელმძღვანელმა, მაია ამიროვამ.

 

„15-20 პირველკლასელს ველით“, - სიამაყით აცხადებს etaloni.ge-სთან მარნეულის მუნიციპალიტეტის ახლოლალოს საჯარო სკოლის დირექტორი მაჰარამ ხალილოვი.

 

და თამამად შეგვიძლია ვთქვათ, რომ ლიდერს სიამაყის საფუძველი უდავოდ აქვს: ახლოლალოს საჯარო სკოლა საბაზოა და როგორც ბატონი მაჰარამი ამბობს, მისი მოსწავლეებისთვის სწავლა პრიორიტეტია. ისინი ჯერ სხვა სკოლაში, შემდეგ კი ან უმაღლეს ან პროფესიულ სასწავლებელში განაგრძობენ განათლების მიღებას.

 

„მიხარია, რომ ჩვენი სკოლა ბავშვებს ისეთ ღირებულებებს უნერგავს, რაც მათ სამომავლო წარმატებას განსაზღვრავს. 15-20 პირველკლასელს ველით, რომელთაც უსაფრთხო გარემოსა და ყველა საჭირო რესურსს დავახვედრებთ“.

 

დოლხან ალიევი, მარნეულის მუნიციპალიტეტის ბეითარაბჩის საჯარო სკოლის ხელმძღვანელიც დაახლოებით ხუთ პირველკლასელს ელის.

 

„ამ ეტაპზე ზუსტი მონაცემები არ გვაქვს, თუმცა ერთი რამ დანამდვილებით შემიძლია გითხრათ, თითოეული მოსწავლე და აქ მხოლოდ პირველკლასელებს არ ვგულისხმობ, უზრუნველყოფილი იქნება საჭირო რესურსებით. ყველაზე უმცროს მოსწავლეებს კომპიუტერები და სახელმძღვანელოები დახვდებათ... ვფიქრობ, სწორედ ასეთი დეტალები განაპირობებს ჩვენი მომავალი თაობის მოტივაციას, ისწავლონ კარგად, ჰქონდეთ მაღალი აკადემიური მოსწრება და მიაღწიონ წარმატებებს ცხოვრების ყველა ეტაპზე“, აღნიშნავს ბეითარაბჩის საჯარო სკოლის დირექტორი.

 

მარნეულის მუნიციპალიტეტის ალავარის საჯარო სკოლაში დაახლოებით 15 პირველკლასელს ელიან, თუმცა როგორც დირექტორი, მულქადარ ისმაილოვი ამბობს, 30 ბავშვის მიღების საშუალება აქვთ.

 

„იქიდან გამომდინარე, რომ რეგისტრაცია არ დასრულებულა, ზუსტად თქმა, რამდენი პირველკლასელი გვეყოლება, ცოტა რთულია... დაახლოებით 15 მოსწავლეს ველით, თუმცა იმედი მაქვს ეს რიცხვი შეიცვლება“, - განაცხადა მულქადარ ისმაილოვმა.

 

სამაგიეროდ, 50-მდე პირველკლასელს ელის, მარნეულის მუნიციპალიტეტის ალგეთის N1 საჯარო სკოლის დირექტორი მუსა ომაროვი.

 

„ამჟამად 32 პირველკლასელია რეგისტრირებული, თუმცა დაახლოებით 50 მოსწავლეს ველით... არც ადგილების რაოდენობის მხრივაა პრობლემა, რამდენი პირველკლასელიც დარეგისტრირდება, თითოეულ მათგანს, ალგეთის N1 საჯარო სკოლა დიდი სიხარულით შეხვდება“, - აღნიშნავს სკოლის ლიდერი.