დამტკიცდა ბათუმის, ქობულეთის, ხელვაჩაურის, ქედის, შუახევის და ხულოს რესურსცენტრების დებულება, რომელსაც ხელს აწერს აჭარის ა/რ განათლების მინისტრი მაია ხაჯიშვილი.
დოკუმენტი უკვე ძალაშია და მეორე მუხლის მე-2 პუნქტში დეტალურადაა გაწერილი ის 35 საკითხი, რომელიც უშუალოდ შედის საგანმანათლებლო რესურსცენტრების კომპეტენციაში მათ შორისაა საჯარო სკოლებსა თუ სამინისტროს მიერ დაფუძნებულ პროფესიულ საგანმანათლებლო დაწესებულებებში მიმდინარე პროცესების ზედამხედველობა, ასევე აღნიშნული დაწესებულებების კონსულტირება.
რესურსცენტრებმა უნდა უზრუნველყონ სამოქმედო ტერიტორიაზე არსებულ საჯარო სკოლებში სასწავლო პროცესისა და გარემოს მონიტორინგი-შეფასება, შეადგინონ ანგარიშები, რომელთა საფუძველზე უნდა შეიმუშაონ რეკომენდაციები; მათ შორის მონიტორინგი ეხება „ეროვნული სასწავლო გეგმის შესაბამისად სასწავლო პროცესის წარმართვას ხელშემწყობი სასწავლო გარემოს უზრუნველყოფით, ასევე, საგანმანათლებლო-აღმზრდელობითი პროგრამებისა და პროექტების განხორციელებას“.
საგანმანათლებლო რესურსცენტრებმა მონაწილეობა უნდა მიიღონ მასწავლებლის საქმიანობის დაწყების, პროფესიული განვითარებისა და კარიერული წინსვლის სქემის ფარგლებში, მასწავლებლის შეფასების პროცესში და ხელი შეუწყონ მოსწავლეთა პროფესიული ორიენტაციისა და კარიერის დაგეგმვის სისტემის დანერგვას.
ცვლილება შეეხო რესურსცენტრების უფლება-მოვალეობებს სკოლის დირექტორთა ნაწილშიც. დადგენილებაში ვკითხულობთ, რომ:
„კ) სამინისტროს წარუდგენს ინფორმაციას დირექტორის მოვალეობის შემსრულებლის კანდიდატურის შესახებ, ასევე, დირექტორის მოვალეობის შემსრულებლის უფლებამოსილების შეწყვეტის საფუძვლის წარმოშობის შემთხვევაში, დირექტორის მოვალეობის შემსრულებლის უფლებამოსილების წარმოშობის/შეწყვეტის მიზნით;
ლ) სამინისტროს წარუდგენს ინფორმაციას დირექტორის/დირექტორის მოვალეობის შემსრულებლის მიერ თავისი უფლებამოსილების განხორციელების შეუძლებლობის შემთხვევაში მოვალეობის შემსრულებელი მოადგილის, ან სხვა უფლებამოსილი პირის უფლებამოსილების წარმოშობის, ასევე უფლებამოსილების შეწყვეტის შესახებ შესაბამისი გადაწყვეტილების მიღების მიზნით“.
ტერიტორიული ორგანოების წარმომადგენლებმა ასევე თვალყური უნდა ადევნონ სამოქმედო ტერიტორიაზე არსებულ საჯარო სკოლებში სამეურვეო საბჭოებისა და დირექტორების არჩევნების მიმდინარეობას, ითანამშრომლონ მულტიდისციპლინურ გუნდთან.
რაც შეეხება რესურსცენტრების როლს სკოლამდელ დაწესებულებებთან მიმართებით, „სკოლამდელი განათლების სფეროში მუნიციპალიტეტების კონსულტირება და მხარდაჭერას სკოლამდელი განათლების ხარისხის უზრუნველყოფისა და მონიტორინგის სისტემის ხელშეწყობის მიზნით“, მათ მოვალეობად განისაზღვრა.
