კონფერენციის მიზანი იყო საბუნებისმეტყველო მეცნიერებების პოპულარიზაცია, აღნიშნული დისციპლინებით დაინტერესებული მოსწავლეების გამოვლენა, მათი მოტივირება, სასწავლო პროცესში ტექნოლოგიების ინტეგრირება, მოსწავლეებში ძიებისა და ანალიზის, კვლევისა და პრეზენტაციის უნარების განვითარება, მოსწავლეთა შორის კოლაბორაციისა და კომუნიკაციის ხელშეწყობა, მათი ინოვაციური ხედვების გამოვლენა-გაზიარება. 

კონფერენციაში მონაწილეობის მიღება შეეძლოთ ახალციხის №1, №2, №5, №6 სკოლებისა და კერძო სკოლა ,,მზექა“-ს X-XI კლასის მოსწავლეებს. 

დარეგისტრირება და ყველა შემდგომი საფეხური განხორციელდა ელექტრონულად, სარეგისტრაციო ფორმაში მითითებულ ელ. ფოსტაზე გამოგზავნილი პრეზენტაციები და მოხსენებები შეაფასა საბუნებისმეტყველო მეცნიერებათა კათედრის მიერ შერჩეულმა კომისიამ, რომელმაც შეფასების კრიტერიუმებზე დაყრდნობით შეარჩია 9 მომხსენებელი მოსწავლე სამი საგნობრივი მიმართულებიდან, ხოლო მათ შორის გამოავლინა სამი საუკეთესო ნაშრომის ავტორი. 

კონფერენციაში მომხსენებლად მონაწილეობა მიიღეს ახალციხის №5 და №2 სკოლების მოსწავლეებმა: მიმართულება ფიზიკა: ანი ანანიაშვილი, მარიამ დევნოსაძე, გვანცა ნოზაძე; მიმართულება ქიმია: მედეა ლომიძე, ანი გოგნაძე, მარიამ ბერიძე; მიმართულება ბიოლოგია: ნათია მაჭავარიანი, მარი იაძე, სოფიო თედორაძე; კონფერენციამ მეტად საინტერესო ვითარებაში ჩაიარა. 

მოსწავლეთა პრეზენტაციები ძალიან მრავალფეროვანი იყო და მეტად პრობლემურ და აქტუალურ თემებს შეეხებოდა. 

ბავშვებმა წარმოადგინეს როგორც ზოგადი კვლევები, ისე საკუთარი შეხედულებები, მინი-კვლევები, რეკომენდაციები თითოეულ პრობლემასთან დაკავშირებით და მსმენელში დიდი ინტერესი გამოიწვიეს. 

კონფერენცია შეაჯამა კონფერენციის ორგანიზატორმა და ხელმძღვანელმა, ახალციხის №5 სკოლის საბუნებისმეტყველო მეცნიერებათა კათედრის თავმჯდომარემ, ფიზიკის მასწავლებელმა მაია თათეშვილმა, მოსწავლეებს სერტიფიკატები და ფასიანი საჩუქრები, ხოლო ხემძღვანელ მასწავლებლებს მადლობის სიგელები გადასცა სკოლის დირექტორმა, ინგა ვარდიძემ. 

კონფერენციას ესწრებოდნენ: სკოლის დირექცია, მასწავლებლები, მოსწავლეები, მშობლები, მოწვეული სტუმრები: ქ. ახალციხის საგანმანათლებლო რესურსცენტრის ხელმძღვანელი, №2 სკოლის დირექტორი და პედაგოგები. 

კონფერენცია თავისი მსვლელობითა და დაჯილდოების საზეიმო პროცესით „მეცნიერების ნამდვილ ზეიმად იქცა“.