კონსტანტინე მეძველიას სახელობის ხონის მუნიციპალიტეტის სოფელ ნახახულევის საჯარო სკოლის კურსდამთავრებული თამთა სანოძე იმ აბიტურიენტთა რიგებშია, რომლებმაც ერთიან ეროვნულ გამოცდებზე, ინგლისურ ენაში მაქსიმალური - 70 ქულა მოიპოვეს.
როგორც სკოლაში გვიყვებიან, ის ერთ-ერთი გამორჩეული მოსწავლე გახლდათ, რომელმაც სკოლა არაერთხელ ასახელა და სასკოლო საზოგადოებისთვის იმედები არც ამჯერად გაუცრუებია.
თავად აბიტურიენტი კი ამბობს, რომ მთელი წელი ემზადებოდა და გამოცდიდან თავდაჯერებული გამოვიდა.
„მთელი სასწავლო წლის განმავლობაში საფუძვლიანად ვემზადებოდი, რამაც შედეგი გამოიღო და გამოცდიდან თავდაჯერებული გამოვედი, რადგან ვიცოდი, რომ ჩემი ცოდნა მაქსიმალურად გამოვავლინე.
დაინტერესებული ვარ პროგრამირებით, შესაბამისად, სწავლის გაგრძელებას ქუთაისის საერთაშორისო უნივერსიტეტში, კომპიუტერული მეცნიერების ფაკულტეტზე ვაპირებ“,- თქვა თამთა სანოძემ.
კურსდამთავრებულმა რჩევები არც მომავალი აბიტურიენტებისთვის დაიშურა.
„მომავალ აბიტურიენტებს ვურჩევდი, რომ ადრევე დაიწყონ მომზადება გამოცდებისთვის, იყვნენ სტაბილურები სწავლის დროს, რათა დარწმუნდენ საკუთარ შესაძლებლობებში. ეს მათ დაეხმარება შეინარჩუნონ სიმშვიდე. ასევე, ვთვლი, რომ პოზიტიური განწყობა არანაკლებ მნიშვნელოვანია მაღალი შედეგის მისაღებად“,- ამბობს კურსდამთავრებული.
იხილეთ ფოტო:
