ანდრია რაზმაძის სახელობის ქალაქ ქუთაისის N41 ფიზიკა-მათემატიკის საჯარო სკოლაში საკუთარი საქმის პროფესიონალი, მოტივირებული და განვითარებაზე ორიენტირებული პედაგოგები მუშაობენ.
მათ შორის ერთ-ერთი გახლავთ მათემატიკის მასწავლებელი ივანე გოქაძე, რომელსაც საზოგადოებისა და განათლების სისტემის განვითარებაში შეტანილი განსაკუთრებული წვლილისთვის გადაეცა 2024 წლის მასწავლებლის ეროვნული პრემია - სპეციალურად შექმნილი სამკერდე ნიშანი და ფულადი ჯილდო 10 000 ლარის ოდენობით.
როგორც სკოლაში გვიყვებიან, ეს ღირსეული ტიტული თავდაუზოგავი შრომის, პროფესიონალიზმისა და საკუთარი საქმის დიდი სიყვარულის შედეგია, რომელსაც ივანე გოქაძე დიდი ხანია იმსახურებდა.
„დიდი სიხარულითა და სიამაყით გიზიარებთ სასიამოვნო სიახლეს!
ვულოცავთ ბატონ ვანოს ამ დამსახურებულ ჯილდოს და ვუსურვებთ კიდევ უფრო დიდ წარმატებებს, ჩვენი ქვეყნისა და სკოლის საკეთილდღეოდ“,- ამბობენ სკოლაში.
აღსანიშნავია, რომ მასწავლებლის ეროვნული პრემიის ფარგლებში განაცხადების მიღება 2024 წლის აპრილში დაიწყო და ივლისში დასრულდა. კონკურსში მთელი საქართველოს მასშტაბით ჯამში 2000-ზე მეტი პედაგოგი იღებდა მონაწილეობას. 10 გამარჯვებული გამოავლინა სპეციალურმა კომისიამ, რომელიც დაკომპლექტებული იყო სხვადასხვა პროფესიის მქონე ადამიანებით.
იხილეთ ვიდეო:
