მასწავლებლის საქმიანობა შრომატევადი და გამოწვევებით სავსეა. პედაგოგმა სწავლების თანამედროვე მეთოდებს ფეხი უნდა აუწყოს და თანაც, მოსწავლეებთან უწყვეტი კავშირი შეინარჩუნოს.
მათთვის სასწავლო წლის ყველა ეტაპი, ფაქტობრივად, ერთნაირად დატვირთულია, თუმცა, საინტერესოა, რას ფიქრობენ პედაგოგები - რომელია მათთვის წელიწადის ყველაზე რთული დრო.
ჩატარდა მასწავლებლების გამოკითხვა, რომელშიც პედაგოგების უმეტესმა ნაწილმა ყველაზე რთულ სეზონად გაზაფხული დაასახელა. მეორე ადგილზე ზამთარი გავიდა, შემდეგ შემოდგომა, ხოლო ბოლოზე ზაფხული.
გაზაფხული, ტრადიციულად, ზრდისა და განვითარების დროა. ამ პერიოდში ბუნებაც იღვიძებს და ყველგან განახლება იგრძნობა, მათ შორის, სკოლებშიც.
მთელი ზამთრის განმავლობაში, საკლასო ოთახებში მყოფ მოსწავლეებს, გაზაფხულზე გარეთ გასვლა და საინტერესო აქტივობებში ჩართვა სურთ. სწორედ ამიტომ, ბავშვებიც, როგორც დანარჩენი სამყარო, გაზაფხულის დადგომასა და ბუნების გაღვიძებას მოუთმენლად ელიან. აქედან გამომდინარე კი, რთული მისახვედრი არ არის, გაზაფხული მასწავლებლებისთვის მეტად დატვირთული პერიოდი რატომ არის.
აქვე აღსანიშნავია, ის, რომ როგორც პედაგოგებმა აღნიშნეს, გაზაფხულზე სწავლების ნაკლი ის არის, რომ მოსწავლეები სასწავლო წლის დასრულებასა და არდადეგებს ისე ელიან, რომ ზოგჯერ გაკვეთილებზე ყურადღება ეფანტებათ და ფიქრებით სულ სხვაგან არიან. ამიტომაც, სასწავლო საკითხებზე მათი კონცენტრირება ძალიან რთული ხდება.
გამოკითხვაში მეორე ადგილზე ზამთარი გავიდა. როგორც მასწავლებლებმა თქვეს, მათ ეს პერიოდი თავისებურ სირთულეებს უქმნის. დეკემბერში მოსწავლეები ახალ წელსა და დასვენებას ელიან, რაც მათ სამუშაოს კიდევ უფრო ართულებს. ბავშვებს კონცენტრაციის პრობლემები ექმნებათ. გარდა ამისა, უამინდობის გამო ფიზიკური აქტივობი თითქოს მეორე პლანზე ინაცვლებს. ეს კი იმას ნიშნავს, რომ საკლასო ოთახი ისეთი მოსწავლეებითაა სავსე, რომლებმაც არ იციან, ენერგია სად დახარჯონ. ყოველივე ეს კი, მასწავლებლებისთვის დატვირთულ სამუშაოს ქმნის.
შემოდგომა სასკოლო საზოგადოებისთვის განახლების დროა. ამ დროს, მოსწავლეები სკოლაში ახალი მიზნებითა და გეგმებით მიდიან. მათ უნდათ, რომ ყველა დასახულ მიზანს მიაღწიონ. თანაც, ზაფხულის არდადეგების მერე განტვირთულები არიან, სკოლაში ძალიან კარგად იქცევიან. შესაბამისად, ეს პერიოდი „ვარდისფერი სათვალის“ ხანაა.
და ბოლოს, ზაფხული. ეს დრო მასწავლებლებმა ნაკლებსტრესულად დაასახელეს. ეს ალბათ, გასაკვირი სულაც არ არის, რადგან მათთვის შვებულებების პერიოდია და სასკოლო საკითხებით დატვირთულები ნაკლებად არიან.
