ხონის მუნიციპალიტეტის სოფელ გორდის საჯარო სკოლის მე-10 კლასის მოსწავლე ანა კირთაძე პროგრამის - „ჩემი პირველი კომპიუტერი“ ფარგლებში დაჯილდოვდა.
საბაზო საფეხურის წარჩინებით დასრულებისთვის ის პორტაბელური კომპიუტერით დასაჩუქრდა. ანა კირთაძეს ჯილდო ხონის მერმა - ლადო ჯოხაძემ და რესურსცენტრის ხელმძღვანელმა - ჯულიეტა ქობალიამ გადასცეს.
მოსწავლის დამრიგებელი ლეილა ქაროსანიძე გახლავთ.
სკოლაში მოსწავლეს ულოცავენ სწავლაში მიღწეულ წარმატებასა და დამსახურებული ჯილდოს მიღებას, უსურვებენ ასეთივე შემართებით გააგრძელოს განათლების მიღება.
„გვახარებს ჩვენი სკოლის ღირსეული მე-10 კლასის მოსწავლის - ანა კირთაძის კიდევ ერთი წინ გადადგმული ნაბიჯი“,- აღნიშნავენ სკოლაში.
შეგახსენებთ, რომ პროგრამა - „ჩემი პირველი კომპიუტერი“ 2009 წლიდან ხორციელდება. პროგრამით საჯარო სკოლის ის მოსწავლეები სარგებლობენ, რომლებმაც საბაზო საფეხური წარჩინებით დაამთავრეს და მათი საფეხურის ნიშანი 10 ქულაა.
იხილეთ ფოტოები:
