ლანჩხუთის მუნიციპალიტეტის სოფელ ნინოშვილის საჯარო სკოლაში, როგორც ფორმალურ ასევე არაფორმალურ განათლებას მნიშვნელოვანი ყურადღება ექცევა. სწორედ ამიტომ, პედაგოგები მოსწავლეებს საინტერესო და მრავალფეროვან აქტივობებს სთავაზობენ.
ამჯერად, სკოლაში ილია ჭავჭავაძის დაბადების დღე ღონისძიებით აღინიშნა, რომელსაც უძღვებოდნენ ქართული ენის პედაგოგები: ციალა ტუღუში და დარეჯან გიგინეიშვილი.
აღნიშნული ღონისძიების მუსიკალურ გაფორმებაზე იზრუნა მუსიკის პედაგოგმა - ნანა მიქაბერიძემ.
ამ დღისადმი მიძღვნილ ღონისძიებაში სხვადასხვა კლასის მოსწავლეები აქტიურად მონაწილეობდნენ. ბავშვებმა წაიკითხეს ილია ჭავჭავაძის ლექსები, ნაწყვეტები მისი მოთხრობებიდან და პუბლიცისტური წერილებიდან. ილია ჭავჭავაძის განუზომელი ღვაწლი დამსწრე საზოგადოებას მოკლედ კიდევ ერთხელ შეახსენეს ღონისძიების ორგანიზატორმა ქართული ენის პედაგოგებმა.
აღსანიშნავია, რომ მცირეკონტინგენტიანი სკოლა ამჟამად მეორე ცვლაში მუშაობს მეზობელი სოფლის სკოლის შენობაში.
„სკოლის დირექცია და კოლექტივი შექმნილი სირთულეების ფონზე ყოველმხრივ ცდილობს ბავშვებს შესთავაზოს არაფორმალური განათლების მრავალფეროვანი აქტივობები“, - ამბობენ სკოლაში.
იხილეთ ფოტოები:
