სამტრედიის N12 საჯარო სკოლის 1-ელა კლასში დიდი ჟრიამული იყო.
იქ შემოდგომის სილამაზე, სურნელი და ფერთა გამა იყო წარმოდგენილი. კლასში, პედაგოგ ნატალია ადეიშვილისა და მშობელთა აქტიური ჩართულობითა და თანამშრომლობით, საოცარი, ლამაზი, უჩვეულოდ ფერადი და შემოქმედებითი გარემო შეიქმნა.
როგორც სკოლაში გვიყვებიან, მოეწყო გამოფენა, სადაც წარმოდგენილი იყო საქართველოს კუთხეების ამსახველი სახლებისა და ეზოების მაკეტები. ღონისძიების კულმინაცია კი, თათარაში ახლადამოვლებული ჩურჩხელებით ხელში აჟრიამებული მოსწავლეები იყვნენ.
სკოლის დირექტორმა - ნინო ონიანმა მონაწილე ბავშვებსა და ღონისძიებაში აქტიურად ჩართულ მშობლებს მადლობა გადაუხადა.
„შემოდგომა წელიწადის დროებიდან ერთ-ერთი ულამაზესი სეზონია. საოცარია ამ დროს ბუნება, ფერთა შეხამება. პატარების ნიჭიერებამ და სილაღემ, მშობელთა შემოქმედებითობამ დიდი შთაბეჭდილება დატოვა დამსწრე საზოგადოებაზე. მადლობა დახმარებისთვის მუსიკის მასწავლებლებს - თეონა გაბედავასა და ლელა გოლიაძეს“,- აღნიშნეს სკოლაში.
იხილეთ ფოტოები:
