ვანის მუნიციპალიტეტის სოფელ ტობანიერის საჯარო სკოლაში მეტად საინტერესო სასწავლო პროცესი მიმდინარეობს, პედაგოგები სწავლებისას საინტერესო მეთოდებსა და სტრატეგიებს მიმართავენ და მოსწავლეებს გაკვეთილებს უმრავალფეროვნებენ.
ამის ნათელი მაგალითია, IX კლასში ჩატარებული ინტეგრირებული გაკვეთილი, ქართულ ენასა და ისტორიაში, რომელსაც პედაგოგები ელგა რამიშვილი და ციცინო გაბუნია ხელმძღვანელობდნენ.
შთამბეჭდავი გაკვეთილის შესახებ ინფორმაციას სკოლის წარმომადგენელი გვიზიარებს.
„არაერთხელ დამიწერია ინტეგრირებული გაკვეთილების სიკეთეებსა და უდიდეს მნიშვნელობაზე!დღევანდელი დღეც კიდევ ერთი ნათელი მაგალითია ამ ყველაფრის!
მინდა გაგიზიაროთ IX კლასში ჩატარებული ინტეგრირებული გაკვეთილი, ქართულ ენასა და ისტორიაში.
თემა - ნიკოლოზ ბარათაშვილის პოემა - „ბედი ქართლისა“.
მოვისმინეთ თითოეული მოსწავლის შესრულებული კომპლექსური დავალებები, რომლებშიც ძალიან ვრცლად და საინტერესოდ საუბრობდნენ, თუ როგორ აისახა ქართველი მწერლის შემოქმედებაში საქართველოს დამოუკიდებლობის დაკარგვის თემა, ბრწყინვალედ დაუკავშირეს აღნიშნული ნაწარმოები ისტორიულ კონტექსტსა და თანამედროვეობას, იმსჯელეს თუ რა დიდი მნიშვნელობა აქვს სახელმწიფო სათავეში მყოფი პირების გადაწყვეტილებას ქვეყნის მომავალი კეთილდღეობისთვის.
უაღრესად საინტერესო იყო თითოეული მათგანის მსჯელობა იმაზე, როგორი მძიმე არჩევანის წინაშე იყო იმ დროს ერეკლე II, როცა ქართველობა ზნეობრივად და სულიერად დაცემული იყო...
უამრავი საინტერესო გაკვეთილი და წარმატება დაგებედოთ - ელგა რამიშვილი და ციცინო გაბუნია, თქვენს არაჩვეულებრივ მოსწავლეებთან ერთად!“,- აღნიშნავენ სკოლაში და ახარებთ მოსწავლეთა აქტიურობა და მასწავლებელთა შემოქმედებითობა.
იხილეთ ფოტოები: