ყვარლის მუნიციპალიტეტის, წიწკანაანთსერის საჯარო სკოლაში განსაკუთრებული ყურადღება ეთმობა ბავშვების მრავალმხრივ განვითარებას; აქედან გამომდინარე, ხარისხიანი საგაკვეთილო პროცესის მიმდინარეობის პარალელურად, პედაგოგების ხელმძღვანელობით ტარდება მრავალფეროვანი აქტივობები, რომლებიც მოსწავლეთა თვალსაწიერის გაფართოებასა და მიღებული ცოდნის განმტკიცებას ემსახურება.
ამის დასტურია გალაკტიონ ტაბიძისადმი მიძღვნილი ღონისძიება - ქართული ენისა და ლიტერატურის მასწავლებელმა, თამარ სეფაშვილმა III, VII და VIII კლასების მოსწავლეებს მოუთხრო გალაკტიონის ბიოგრაფიის საინტერესო ეპიზოდები, რამაც მოსწავლეთა ინტერესი გააღვივა - მათ მოისურვეს, მეტი შეეტყოთ მე-20 საუკუნის უდიდესი პოეტის შესახებ.
აქტივობის ფარგლებში, კლასში მოსწავლეებმა ნახეს რეზო თაბუკაშვილის სახელობის თეატრის მიერ
შექმნილი დოკუმენტური ფილმი, აგრეთვე მოისმინეს გალაკტიონ ტაბიძის ბიოგრაფის - ვახტანგ ჯავახაძის მონათხრობი პოეზიის უგვირგვინო მეფე გალაკტიონზე...
„ასევე წაიკითხეს გალაკტიონის ლექსები და აღფრთოვანდნენ ლექსწერის სტრატეგიებით: მხატვრული
ხერხებით, რითმითა და განუმეორებელი რიტმით... შთამომავლობამ შეიყვარა „მე და ღამის“, „მთაწმინდის მთვარის“, „ლურჯა ცხენების“, „იისფერი თოვლისა“ და კიდევ სხვა მრავალი პოეტური შედევრის შემქმნელი „მეფე მგოსანი“ - გალაკტიონი.
მოსწავლეები გაეცნენ გალაკტიონის წერილს ოლღა ოკუჯავასადმი, ასევე ოლღას საპასუხო წერილს. მოიხიბლნენ უსათუთესი ეპითეტებით შემკული წერილით, რომელიც მან დედას გაუგზავნა სოფელში...“ - აღნიშნულია სკოლის მიერ გავრცელებულ ინფორმაციაში.
ღონისძიების დასასრულს შეიქმნა ორი ჯგუფი და შერჩეული ლექსის - „წერილი სოფლიდან“ სტრიქონების ორტაეპედებში გამოტოვებული ბოლო სიტყვების სანაცვლოდ, პირადი გამოცდილებითა და წინა ტაეპის რითმაზე დაკვირვებით შეავსეს დაკლებული სარითმო ერთეულები...
„რითმობანა“ შემეცნებითი და სახალისო აღმოჩნდა ბავშვებისთვის - მათ კარგად გაართვეს თავი შეთავაზებულ აქტივობას, შემდეგ კი ლექსის სტრიქონები თანამიმდევრულად დაალაგეს და აღადგინეს ლექსი.
იხილეთ ვიდეოები და ფოტოები
