თბილისის N175 საჯარო სკოლა დაუნის სინდრომის შესახებ ცნობიერების ამაღლებისკენ მიმართულ მსოფლიო ღონისძიებას აქტიურად შეუერთდა.
21 მარტს, მსოფლიო, ყოველწლიურად აღნიშნავს დაუნის სინდრომის საერთაშორისო დღეს.
ამ დღის მიზანია საზოგადოების ცნობიერების ამაღლება, სტერეოტიპების დამსხვრევა და ინკლუზიურობის ხელშეწყობა. თბილისის N175 საჯარო სკოლა აქტიურად ეხმიანება ამ საერთაშორისო ინიციატივას, რათა მოსწავლეებმა უკეთ გაიაზრონ რას ნიშნავს დაუნის სინდრომი და რატომ არის მნიშვნელოვანია ინკლუზიური გარემოს შექმნა.
21 მარტს, სპეციალური მასწავლებლები გადანაწილდნენ მეექვსე კლასებში და მოსწავლეებთან ერთად ჩაატარეს საინფორმაციო შეხვედრები.
პედაგოგებმა თითოეულ კლასში განიხილეს დაუნის სინდრომის რაობა, მოსწავლეებისთვის მარტივი და გასაგები ენით.
მოეწყო დისკუსია - „მითი თუ რეალობა“. სადაც ბავშვებმა იმსჯელეს, გავრცელებული სტერეოტიპები დამსხვრიეს და მითები და რეალობა ერთმანეთისგან გამიჯნეს.
მოსწავლეებმა სხვადასხვა ქვეყანაში მცხოვრები სინდრომის მქონე ცნობილი ადამიანები გაიცნეს და ისაუბრეს მათი წარმატების შესახებ. მაგალითად დასახელდა - კრის ნიკიჩი – პირველი ადამიანი დაუნის სინდრომით, რომელმაც Ironman-ის ტრიათლონი დაასრულა, მადელინ სტიუარტი – პირველი პროფესიონალი მოდელი დაუნის სინდრომით, ჯემი ბრიუერი – ცნობილი მსახიობი American Horror Story-დან, პაბლო პინედა – ესპანელი პედაგოგი და მსახიობი, პირველი ადამიანი დაუნის სინდრომით, რომელმაც უნივერსიტეტის დიპლომი მიიღო და გიგო შიუკაშვილი – ტელეწამყვანი და პირველი პროფესიონალი ბარმენი საქართველოში, რომელიც დაუნის სინდრომის მქონეა. მათი ისტორიები მოტივაციისა და შთაგონების წყაროა.
როგორც სკოლაში გვეუბნებიან, ამ დღის აღნიშვნა გვეხმარება: სტერეოტიპების დამსხვრევაში – დაუნის სინდრომის შესახებ მცდარი შეხედულებების გაქარწყლებაში, ინკლუზიური გარემოს შექმნაში, რათა ყველა მოსწავლემ იგრძნოს თანასწორობა და მხარდაჭერა, ასევე შემეცნებისა და ემპათიის გაძლიერებაში.
„21 მარტის აქტივობები მნიშვნელოვანია იმისთვის, რომ ბავშვებს ჩამოუყალიბდეთ სწორი და პოზიტიური შეხედულებები დაუნის სინდრომზე.
ჩვენი სკოლა ხელს უწყობს ინკლუზიას, თანასწორობას და მხარს უჭერს თითოეული მოსწავლის უნიკალურ შესაძლებლობებს. მოსწავლეებისთვის ეს იყო მნიშვნელოვანი და სასარგებლო გამოცდილება, რომელიც მათ დაეხმარება გახდნენ უფრო გულისხმიერი, ინფორმირებული და სოციალურად პასუხისმგებლიანი პიროვნებები“,- აღნიშნავენ სკოლაში.
