ლაგოდეხის მუნიციპალიტეტის, არეშფერანის საჯარო სკოლაში სწავლა-სწავლების პროცესი აქტიურ რეჟიმში მიმდინარეობს, მოსწავლეები სრულფასოვნად ერთვებიან სასკოლო ცხოვრებაში და იმავდროულად, უსაფრთხო, ინკლუზიური, თანასწორუფლებიანი გარემოს შექმნა სასკოლო პოლიტიკის ერთ-ერთი პრიორიტეტია.
ამის დასტურია არეშფერანის საჯარო სკოლაში ჩატარებული ღონისძიება, რომელიც აუტიზმის ცნობადობის ამაღლებასა და სასკოლო საზოგადოების წარმომადგენლებისთვის საჭირო ინფორმაციის მიწოდებას ემსახურებოდა.
აღსანიშნავია, რომ აქტივობას ხელმძღვანელობდნენ არეშფერანის საჯარო სკოლის სპეცპედაგოგები - ხათუნა კაპანაძე, ზეინაბ დევაძე და მარინე ლობჟანიძე.
აქტივობა სასკოლო საზოგადოების ინფორმირებას, ემპათიის უნარის გამომუშავებას, სტიგმისა და დისკრიმინაციის აღმოფხვრას, თანასწორობის პრინციპების გათვალისწინებას ისახავდა მიზნად; ბავშვებმა საჯაროდ, გამოხატეს მხარდაჭერა აუტისტური სპექტრის მქონე ადამიანების მიმართ და საზოგადოებაში მათი სრულფასოვანი ინტეგრაციის აუცილებლობაზეც გაამახვილეს ყურადღება.
მოსწავლეებმა საკუთარი ხელით შექმნეს თემატური ნამუშევრები და კიდევ ერთხელ ხაზგასმით აღნიშნეს, რომ ყველა ადამიანი თანასწორია.
„აუტიზმი მიეკუთვნება ნეიროგანვითარებითი დაავადებების ჯგუფს და ხასიათდება სოციალური ურთიერთობების, კომუნიკაციისა და ქცევის სირთულეებით. ის თანაბრადაა გავრცელებული ყველა რასის, ეროვნების, რელიგიური მრწამსისა და სოციალურ-ეკონომიკური სტატუსის მქონე ადამიანებში.
ჩვენი სკოლაც შეუერთდა ამ დღეს აქტივობით, სპეცმასწავლებლებმა: ხათუნა კაპანაძემ, ზეინაბ დევაძემა და მარინე ლობჟანიძემ მოსწავლეებს აუმაღლეს ცნობიერება და მიაწოდეს ინფორმაცია აუტისტური სპექტრის მქონე ბავშვებზე“, - აღნიშნულია სკოლის მიერ გავრცელებულ ინფორმაციაში.
ინფორმაციისთვის: აუტიზმის შესახებ ცნობადობის ამაღლების საერთაშორისო დღე 2 აპრილს, 2007 წლიდან, გაერო-ს გენერალური ასამბლეის ინიციატივით აღინიშნება.
მისი მიზანია, გაზარდოს საზოგადოების ცნობიერების დონე აუტიზმთან დაკავშირებით. ასევე ხელი შეუწყოს აუტიზმის მქონე ადამიანების ფუნდამენტური უფლებების დაცვას.
