წალენჯიხის მუნიციპალიტეტის საჩინოს თემის N2 საჯარო სკოლაში მოსწავლეთა ეკოცნობიერების ამაღლებას მნიშვნელოვანი ყურადღება ექცევა. ამ მიზნით კი არაერთი ღონისძიება თუ აქტივობა იმართება.
ამჟამად, სკოლაში ხორციელდება სასკოლო პროექტი - „შევისწავლოთ და დავიცვათ გარემო“, რომლის მორიგი აქტივობის ფარგლებში მოსწავლეებმა დედამიწის დღე აღნიშნეს.
ჩატარდა ესეების კონკურსი, როგორც სკოლაში გვეუბნებიან, მოსწავლეებმა იმდენად საინტერესო ნამუშევრები წარმოადგინეს, რომ ჟიურის გამარჯვებულების გამოვლენა გაუჭირდა.
წინასწარ შერჩეული კრიტერიუმების მიხედვით გამოვლინდა სამი გამარჯვებული. სკოლის დირექციამ მათ გადასცა ფასიანი საჩუქრები. გარდა ესეებისა, დაწყებითი საფეხურის მოსწავლეებმა წარადგინეს ნახატები დედამიწაზე, თავისი გარემოსდაცვითი გზავნილებით.
„ნაყოფიერი, საინტერესო და ემოციებით დატვირთული აქტივობა გამოვიდა. მადლობა თითოეულ მონაწილეს“,- აღნიშნავენ სკოლაში და ახარებთ მოსწავლეთა მონდომება.
დედამიწის დღე აღინიშნება ყოველწლიურად, 22 აპრილს, მთელ მსოფლიოში ცნობიერების ამაღლებისა და გარემოს დაცვისადმი მხარდაჭერის გამოვლენის მიზნით.
იხილეთ ფოტოები:
