ლუდოვიკო ჭანტურიას სახელობის წალენჯიხის მუნიციპალიტეტის ქალაქ ჯვარის N1 საჯარო სკოლის პედაგოგები მოსწავლეებს საგნობრივ ცოდნასთან ერთად სიკეთის კეთებას, კაცთმოყავრეობასა და ემპათიას ასწავლიან.
სიკეთის გაღება ხშირად სულ ცოტა რამეს საჭიროებს – გულწრფელ სურვილსა და ერთობლივ ძალისხმევას. სწორედ ამ სულისკვეთებით დაიგეგმა მე-5 კლასის მოსწავლეებისა და მათი კლასის დამრიგებლის ინიციატივით, სკოლის თვითმმართველობასთან ერთად, საქველმოქმედო პროექტი – „ერთი კვერცხის აქცია“, რომლის მიზანი იყო დახმარების ხელის გაწოდება სოციალურად დაუცველი ოჯახებისთვის.
იდეა მარტივი, მაგრამ ძალიან დიდი იყო – თითოეულმა ბავშვმა, სიმბოლურად, ერთი კვერცხი მოიტანა. მოსწავლეებმა ერთად შეღებეს. დაურიგეს სოციალურად დაუცველ ადამიანებს და სააღდგომო სიხარული მათთან ერთად გაიზიარეს.
„ეს სიმბოლური აქცია არ იყო მხოლოდ კვერცხების შეგროვება – ეს იყო გულისხმიერების გაკვეთილი, რომელიც ჩვენი მოსწავლეების ცნობიერებაში სამუდამოდ დარჩება.
მადლობა თითოეულ მოსწავლეს, მშობელს ერთად რომ შევძელით სითბოს, სიყვარულისა და თანაგრძნობის გაზიარება იმ ადამიანებისთვის, ვისაც ყველაზე მეტად სჭირდება.
ერთიანობა და თანაგრძნობა – სწორედ ამ ღირებულებების გაღვივებას ემსახურება „ერთი კვერცხის აქცია“. სიკეთე ვაქციოთ ჩვევად“,-აღნიშნავენ სკოლაში.
იხილეთ ფოტოები:
