სკოლა სიახლეებისა და გამოწვევების ადგილია, სივრცეა, სადაც თქვენი პატარა ულევ ინფორმაციას იღებს და იმახსოვრებს. შემეცნება არც თუ ისე მარტივი პროცესია და მასალის ასათვისებლად ბავშვებს ინდივიდუალური მიდგომა და საინტერესო ხერხების მოფიქრება სჭირდებათ.

მშობლებისთვის ერთ-ერთი მტკივნეული და აქტუალური საკითხი შვილისთვის გამრავლების ტაბულის შესწავლაა, სწორედ ამიტომ Etaloni.ge გთავაზობთ მეთოდებს, რომლებიც თქვენს პატარას ციფრების სამყაროში სწორი პასუხების დამახსოვრებას გაუადვილებს:

არიან ბავშვები, რომლებიც განსაკუთრებით მარტივად იმახსოვრებენ ლექსებს და თუ თქვენი შვილიც მათ რიცხვს მიეკუთვნება, მოიძიეთ ან მოიფიქრეთ მისთვის მათემატიკური ლექსები და რიტმულობით რიცხვების გადამრავლება გაუმარტივეთ. ლექსები ძილის წინ ასწავლეთ პატარას, რათა გათენებისას ამ ცოდნის პრაქტიკაში გამოყენება შეძლოს.

მაგალითად:

ერთ პაწია ჭიანჭველას ზურგზე ტვირთი ეკიდა, 

თვითონ იყო ერთი ციდა მისხალს ძლივს იწონიდა, 

2-ჯერ მეტ ტვირთს მიათრევს და ამაყობს ამით, 

რამდენია ტვირთის წონა? მიმანიშნე რამით... 

(მაია მჭედლიშვილი)

გამრავლების ტაბულის შესწავლის ნაცადი და ეფექტური ხერხი ცხრილის შვილთან ერთად შედგენაა. აიღეთ ფურცელი და დახაზეთ ის მათემატიკური უჯრების მსგავსად. დაიწყეთ 1-ზე გამრავლებით და პასუხები თავად მოსწავლეს შეატანინეთ ცხრილში.