ქართველი კლასიკოსი მწერალი და დრამატურგი თამაზ ჭილაძე 87 წლის ასაკში, ხანგრძლივი ავადმყოფობის შედეგად, 28 სექტემბერს გარდაიცვალა.

თამაზ ჭილაძეს მიღებული აქვს რუსთაველის სახელმწიფო და კიდევ რამდენიმე სხვა პრემია. 1996 წელს დასავლეთ გერმანიის რადიო მაუწყებლობამ მიანიჭა პირველი პრემია პიესისთვის „სამოთხის კვარტეტი“. 1999 წელს კემბრიჯის საერთაშორისო ბიოგრაფიულმა ცენტრმა „საერთაშორისო ადამიანის“ წოდების ნომინანტად დაასახელა.

1957 წლიდან იყო მწერალთა კავშირის წევრი.

ის არაერთი პროზაული ნაწარმოებისა და პიესის ავტორია, რომელიც მსოფლიოს მრავალ ენაზეა თარგმნილი.

მის პიესებს სხვადასხვა თეატრში დგამდნენ რეჟისორები: რობერტ სტურუა, თემურ ჩხეიძე, გიზო ჟორდანია, გიგა ლორთქიფანიძე და სხვები.

თამაზ ჭილაძე 1931 წლის 5 მარტს, ქალაქ სიღნაღში დაიბადა.