2020 წლიდან ერთიან ეროვნულ გამოცდებზე ზოგადი უნარების გამოცდა სავალდებულო აღარ იქნება და ყველა აბიტურიენტისათვის მისაღები გამოცდები სამ სავალდებულო საგანში ჩატარდება.
კერძოდ კი სავალდებულო იქნება ქართული ენისა და ლიტერატურის და უცხო ენის გამოცდები, მესამე სავალდებულო საგანი კი განისაზღვრება უმაღლესი სასწავლებლის პროგრამების მიხედვით: მათემატიკა - ტექნიკური მიმართულებების შემთხვევაში, ისტორია - ჰუმანიტარული მიმართულების შემთხვევაში. უნივერსიტეტებს უფლება ექნებათ, დაამატონ პროგრამის რელევანტური არჩევითი გამოცდა ზოგადი უნარების გამოცდის ჩათვლით.
დაანონსებულ სიახლეს სოციალურ ქსელში არაერთგვაროვანი რეაქცია მოჰყვა, მათი უმრავლესობა ამბობს, რომ არალოგიკურია ეროვნულ გამოცდებზე მომავალ ექიმს მათემატიკა ან ისტორია ჩააბარებინო.
etaloni.ge სოციალურ ქსელში გამოთქმულ რამდენიმე მოსაზრებას გთავაზობთ:
„ხალხო, მეჩვენება თუ შავით თეთრზე წერია, რომ ბიოლოგიურზე და სამედიცინოზე მათემატიკა ან ისტორია უნდა ჩააბაროს აბიტურიენტმა და არა ბიოლოგია?! ვიტირო თუ ვიცინო?! ისედაც რა დონე გვაქვს სამედიცინო საქმიანობაში და ამის მერე ნახეთ: მათემატიკა ხომ ეცოდინებათ და რა საჭიროა ადამიანის ანატომია და ფიზიოლოგია. თან არჩევითიაო მესამე საგანი და მარტო ისტორია და მათემატიკაა ასარჩევი, სხვა საგანი არ არსებობს?“
„პროფესიების დაყოფა ტექნიკურად და ჰუმანიტარულად სისულელე და ანაქრონიზმია. ეკონომისტმა რომელი უნდა ჩააბაროს? თანამედროვე (რაოდენობრივი) ფსიქოლოგია ვისაც აინტერესებს? მარკეტინგში და პიარში ისტორია უფრო გჭირდება თუ მათემატიკა? მუსიკაში?“
„ჩემი შვილი სწავლობს მედიცინაზე, პირველ კურსზე, მათემატიკა საერთოდ არ სჭირდებათ...ფიზიკა, ბიოლოგია ქიმია... სავალდებულო არჩევითი ეს საგნები უნდა იყოს წესით“.
როგორც შესახებ შეფასებისა და გამოცდების ეროვნული ცენტრის ხელმძღვანელი სოფო გორგოძე განმარტავს, საქართველოსთვის თვითმყოფადობის შენარჩუნება არც ისე მარტივია, ამიტომ გადაწყდა, რომ ჰუმანიტარულ მიმართულებებზე აბიტურიენტებმა მესამე სავალდებულო საგნად ისტორია ჩააბარონ, რათა კიდევ ერთხელ ხაზი გაესვას, რამდენად მნიშვნელოვანია ქვეყნის ისტორიის ცოდნა. ხოლო მისი თქმით, მათემატიკის გარეშე საერთაშორისო ბაზარზე კონკურენტუნარიანი ვერ ვიქნებით, ამიტომ ამ გამოცდის ჩაბარება მნიშვნელოვანია, თუ აბიტურიენტი არაჰუმანიტარულ მიმართულებაზე აბარებს,
ამასთან, როგორც სოფო გორგოძემ აღნიშნა, უნივერსიტეტში ჩაბარების ახალი მოდელი არის გამოცდების ეროვნული ცენტრის ინიციატივა და თუ ვინმე უკეთეს მოდელს წარადგენს, მზად არიან იმსჯელონ.
„რატომ მათემატიკა და ისტორია? - ამის დასაბუთება ასეთია, თუ ეროვნული გამოცდებისთვის იქნება სამი სავალდებულო საგანი, ის ბავშვები, რომლებიც არაჰუმანიტარული მიმართულებით გადაწყვეტენ ჩაბარებას, მნიშვნელოვანია, მათ იცოდნენ მათემატიკა. ზოგადად, მათემატიკის სწავლების მხრივ ძალიან რთული მდგომარეობა გვაქვს ქვეყანაში. და თუ მეხსიერება არ მღალატობს, „კატის“ (CAT) გამოცდებში ჩაჭრილთა ერთ-ერთი ყველაზე მაღალი მაჩვენებლი მათემატიკის გამოცდაში ფიქსირდება, რაც ძალიან სამწუხაროა. მათემატიკის გარეშე ჩვენ ნამდვილად ვერ წავალთ წინ და ვერ ვიქნებით კონკურენტუნარიანი საერთაშორისო ბაზარზე, ამიტომ ეს არის ძალიან მნიშვნელოვანი თუ აბარებ არაჰუმანიტარული მიმართულებით.
რაც შეეხება ჰუმანიტარულ მიმართულებას, ისტორია იმიტომ შევარჩიეთ, რომ ჩვენ ვართ ძალიან პატარა ქვეყანა და ჩვენთვის ჩვენი თვითმყოფადობის შენარჩუნება ძალიან რთულია. ამიტომ მიიღეს გადაწყვეტილება, რომ თუ ადამიანი ჰუმანიტარული მიმართულებით აბარებს, მას ისტორიის ცოდნა უნდა მოვთხოვოთ. ჩვენი ისტორია და ტრადიცია ბავშვებმა უნდა იცოდნენ და ამ საგნის მნიშვნელობა კიდევ ერთხელ წარმოვაჩინოთ“, – განაცხადა სოფო გორგოძემ.
ამასთან, როგორც შეფასებისა და გამოცდების ეროვნული ცენტრის ხელმძღვანელმა აღნიშნა, მსჯელობა შეიძლება, რომ საზოგადოებრივი მეცნიერებებიდან სხვა საგანი იყოს ამორჩეული.
სოფო გორგოძის განცხადებას საზოგადოებრივი მაუწყებელი ავრცელებს.
