განათლების, მეცნიერების, კულტურისა და სპორტის მინისტრის, მიხეილ ბატიაშვილის განცხადებით, მასწავლებლებს ხელფასები 2019 წლის სექტემბრიდან გაეზრდებათ.
ამის შესახებ მინისტრმა პარლამენტის პლენარულ სხდომაზე ანგარიშის წარდგენისას და დაგეგმილ რეფორმებზე საუბრისას განაცხადა.
„მაისში მომზადებულ გეგმას წარმოვადგენთ, სადაც საუბარი იქნება პედაგოგების მიმართულებით რა რეფორმები განხორციელდება, ასევე ვისაუბრებთ შრომის ანაზღაურების ზრდაზე. სექტემბრიდან მოხდება ანაზღაურების ზრდა“, - განაცხადა ბატიაშვილმა პარლამენტში სიტყვით გამოსვლისას.
მინისტრის თქმით, პედაგოგი ნაკლებ დროს უნდა ხარჯავდეს ბიუროკრატიაზე და მეტ დროს შემოქმედებით მიდგომაზე. მისივე განცხადებით, ნებისმიერ პედაგოგს, ნებისმიერ დროს, ნებისმიერ დონეზე შესაძლებლობა უნდა ჰქონდეს, ჩააბაროს გამოცდა და აიმაღლოს კვალიფიკაცია.
მინისტრმა სკოლის ხარისხის გაძლიერებაზეც ისაუბრა და აღნიშნა, რომ ეს თავად სკოლებმა უნდა უზრუნველყონ.
„როგორც დაგპირდით, სკოლის რეფორმის ძირითადი პრინციპებია - სკოლების გაძლიერება - ავტონომია და დეცენტრალიზაცია, ბიუროკრატიიდან შემოქმედებით საკითხებზე გადასვლა, სკოლის დირექტორი, როგორც ლიდერი და პედაგოგი ორიენტირებული შემოქმედებით საკითხებზე. გრძელვადიან პროცესში მაქსიმალურად უნდა გავაძლიეროთ ხარისხის სამსახურები და სკოლა უნდა გახდეს ძლიერი ინსტიტუცია, რომელიც თვითონ ზრუნავს ხარისხის განვითარებაზე“,- აღნიშნა ბატიაშვილმა.
მიხეილ ბატიაშვილი პარლამენტის პლენარულ სხდომაზე რეგლამენტის იმ მუხლის საფუძველზე მივიდა, როცა მინისტრი მოსმენის ინიციატივით პარლამენტს თავად მიმართავს.
