ქარელის მუნიციპალიტეტის, ახალსოფლის საჯარო სკოლის სამოქალაქო კლუბმა ,,ტოლერანტმა“ მცირე გრანტის პროექტის ფარგლებში, ახალსოფელში დევნილთა დასახლებაში ,,მეგობრობის სკვერის“ მოაწყო.
სკოლის წარმომადგენლის თქმით, აღნიშნული პროექტის მიზანი გახლდათ დევნილი და ადგილობრივი მოსახლეობის ინტეგრირება.
„ამავე დროს, სკვერის მოწყობის იდეა გამომდინარეობდა იქიდანაც რომ დევნილთა დასახლებაში ძალიან მწირი მცენარეული საფარია, კლუბის წევრებმა გადაწყვიტეს რომ ნარგავებით ოდნავ მაინც შეეცვალათ არსებული ბუნებრივი გარემო. ხაშურის სატყეო სამსახურმა კლუბის წევრებს ნარგავები უსასყიდლოდ გადასცა. რაც მიგვაჩნია რომ საკმაოდ მნიშვნელოვანი დახმარება იყო ჩვენთვის ამ კეთილ საქმეში. მუშაობის პროცესი საინტერესოდ და კეთილგანწყობილ გარემოში მიმდინარეობდა, მაღალი ინტერესით იყვნენ ჩართული როგორც დევნილი, ასევე ადგილობრივი მოსწავლეები, დახმარება გაგვიწიეს როგორც მშობლებმა, ასევე ჩვეულებრივმა მოქალაქეებმაც. მნიშვნელოვანი დახმარება გაგვიწია საზოგადოება ,,ბილიკმა“, მოგვაწოდეს საჭირო საღებავები, მუდმივად ვგრძნობდით და ვგრძნობთ მათ მხარდაჭერას ყველა საინტერესო წამოწყებაში. ამ პროექტმა ნათლად გამოაჩინა პროექტის თავდაპირველი მიზანი, მისი მიმდინარეობისას კარგად გამოიკვეთა შეცვლილი დამოკიდებულება ადგილობრივ და დევნილ მოსახლეობას შორის, გაჩნდა ერთიანობის განცდა მიზნისკენ მიმავალ გზაზე, მოხდა მეტი დაახლოება, გაერთიანება და კეთილგანწყობის მომატება.
ჩვენთვის ძალიან მნიშვნელოვანია ის ფაქტი რომ პროექტის ინიციატორები, სულისჩამდგმელები და განმახორციელებელი არიან ახალგაზრდები, ქვეყნის და საზოგადოების მომავალი თაობა, მიგვაჩნია რომ მათი თანადგომის ძალა, სიკეთის კეთების უნარი, სამოქალაქო აქტივობები და პრობლემის დანახვის და მოგვარების სურვილი კეთილად წაადგება მსოფლიოს და გაზრდის სამოქალაქო ცნობიერების დონეს, მიგვაჩნია რომ თითოეული წარმატებული პროექტი საწყისი იქნება კიდევ უფრო დიდი და სასარგებლო საქმეების, კიდევ მეტი სიხარულის და უფრო მეტი ახალგაზრდის ჩართვის სამოქალაქო ცნობიერების ამაღლების ფერხულში“,-ამბობს სკოლის წარმომადგენელი.
იხილეთ ფოტოები
