ახალციხის N6 საჯარო სკოლის მე-11 კლასის მოსწავლე ნიკა მახათაძემ FLEX-ის პროგრამაში გაიმარჯვა და ერთი აკადემიური წლით აშშ-ში გაემგზავრება. 

„სამივე ეტაპი წარმატებით გადავლახე და ძალიან ბედნიერი ვარ, ეს მესამე მცდელობა იყო და გამიმართლა. 27 მარტს დამირეკეს და მითხრეს, რომ გამარჯვებული ვარ. ახლა საჭირო დოკუმენტებს ვამზადებთ. ივლისში მოსამზადებელ ბანაკში წავალთ, შემდეგ კი ამერიკაში გავემგზავრებით“ - აღნიშნა ნიკა მახათაძემ. 

მისი თქმით, ამ ეტაპზე არ იციან რომელ შტატში იქნებიან. 

მომავალ ლიდერთა გაცვლითი პროგრამა (FLEX) არის ყოფილი საბჭოთა კავშირის 10 ქვეყნის, მათ შორის საქართველოს, ზოგადსაგანმანათლებლო სკოლების მოსწავლეთათვის განკუთვნილი გაცვლითი პროგრამა. იგი აშშ-ს სახელმწიფო დეპარტამენტის მიერ სრულად ფინანსდება. 

მოსწავლეები ამერიკაში ივლისი-აგვისტოს თვეში გაემგზავრებიან.