წალკის მუნიციპალიტეტის, ჩივთქილისის საჯარო სკოლაში დედა ენის დღესთან დაკავშირებით ღონისძიება გაიმართა. 

დაწყებითი და საბაზო საფეხურის მოსწავლეებმა ამ დღისადმი მიძღვნილი ლექსები წაიკითხეს, ქართული სიმღერები იმღერეს და ქორეოგრაფიული ნომრები შეასრულეს.

სკოლის წარმომადგენლის თქმით, ქართული ენის დღის აღნიშვნა სკოლაში გრძელდება. დედა ენის კვირეულის ფარგლებში კალიგრაფიის, კარნახის, წაკითხული და მოსმენილი ტექსტის გაგება-გააზრების კონკურსები ტარდება.

დედა ენის დღე საქართველოში 14 აპრილს აღინიშნება. 

1978 წლის 14 აპრილს საქართველოს მოსახლეობამ, ინტელიგენციის წარმომადგენლებთან ერთად, მასობრივი გამოსვლა მოაწყო და წინ აღუდგა საბჭოთა კავშირის გადაწყვეტილებას, საქართველოში ქართული ენის, როგორც სახელმწიფო ენის გაუქმების შესახებ.

დაძაბული ვითარების გამო, ოფიციალური მოსკოვი იძულებული გახდა, დაეთმო და კონსტიტუციაში ცვლილება აღარ შევიდა, ხოლო 14 აპრილი „დედაენის დღედ“ გამოცხადდა.

იხილეთ ფოტოები