მასწავლებლები ელექტრონულ სისტემაში პროფესიულ საქაღალდეში დოკუმენტების განთავსების ვადის გახანგრძლივებას ითხოვენ.
მასწავლებელთა პროფესიული განვითარების ეროვნული ცენტრის დირექტორის ბრძანებით, მასწავლებლებს დოკუმენტების განთავსება ელექტრონულ სისტემაში 2018 წლის 20 დეკემბრიდან 2019 წლის 24 ივნისის ჩათვლით შეუძლიათ.
პედაგოგები მასწავლებელთა სახლს აღნიშნული ვადის გახანგრძლივების მიზეზად სკოლებში ინტერნეტის პრობლემას ასახელებენ და ცენტრს ვადის თვის ბოლომდე გადადებას სთავაზობენ.
Etaloni.ge გთავაზობთ სოციალურ ქსელში მასწავლებლების გამოხმაურებას:
-„იმედია, გახსოვთ, რომ სკოლებში აღარც კომპიუტერები შემორჩა და აღარც გამართული ინტერნეტი. ვინც სოფლებში ვმუშაობთ, შუქიც ხშირად არ გვაქვს. ამიტომ თუ უფრო მეტად არა, იქნებ თვის ბოლომდე გააგრძელოთ ვადა“.
-„მადლობა შეხსენებისთვის. მაგრამ, ალბათ, ცნობილია თქვენთვის, რომ ელექტრონულ ბაზაში მუშაობა შეუძლებელია მთელ რიგ სკოლებში ინტერნეტის გაუმართაობის გამო უკვე ორ კვირაზე მეტია. იქნებ გაითვალისწინოთ ეს ფაქტი“
-„ეს ბრძანება მაშინ დაიწერა, როცა ინტერნეტი იყო სკოლებში. ახლა მისალმების შემდეგ მასწავლებლები ინტერნეტს მოიკითხავენ. იმედია, ატვირთვის ვადას თვის ბოლომდე გადასწევენ“.
-„ინტერნეტი არ არის ხელმისაწვდომი გურიის და მთელ რიგ სკოლებში ალბათ ცნობილია თქვენთვის.იქნებ გაითვალისწინოთ ეს ფაქტი", - წერენ მასწავლებლები.
აღნიშნულთან დაკავშირებით ჩვენ მასწავლებლის პროფესიული განვითარების ეროვნული ცენტრის ხელმძღვანელის მოადგილეს, მანანა რატიანს დავუკავშირდით, რათა მისგან გაგვეგო შესაძლებლი იყო თუ არა ვადის გახანგრძლივება.
როგორც რატიანმა გვითხრა, აღნიშნული ვადის შესახებ მასწავლებლებმა დიდი ხანია იციან, შესაბამისად ვადა არ გახანგრძლივდება.
„არავითარ შემთხვევაში, არ გადაიწევს ვადა, რადგან შეფასების ჯგუფმა დროულად უნდა დაიწყოს მუშაობა. შემდეგ მასწავლებლები შვებულებაში გადიან და შეფასების ჯგუფში არიან ასევე მასწავლებლები, რომლებსაც ასევე სჭირდებათ დასვენება. მასწავლებლებმა ამ ვადის შესახებ დიდი ხნის წინ იცოდნენ, რამდენიმე დღის წინ მათ უბრალოდ შევახსენეთ ამის შესახებ“, - განაცხადა მანანა რატიანმა.
ცნობისთვის, მასწავლებელთა პროფესიული განვითარების ეროვნული ცენტრის დირექტორის ბრძანება, მასწავლებლის მიერ ელექტრონულ სისტემაში მისთვის განკუთვნილ ელექტრონულ სივრცეში მასწავლებლის პროფესიულ საქაღალდეში დოკუმენტების განთავსების ვადას ეხებოდა 2018 წლის 17 დეკემბერს გამოქვეყნდა.
იხილეთ ბრძანება:
