საქართველოს მოსწავლეთა ნაკრები 16-22 აპრილს იმყოფებოდა გერმანიის ქალაქ შტუტგარტში ახალგაზრდა მეცნიერთა საერთაშორისო კონფერენციაზე, რომელიც წელს ოცდამეოთხედ ჩატარდა.
ახალგაზრდა მეცნიერები მსოფლიოს 29 ქვეყნიდან ერთმანეთს 5 სამეცნიერო კატეგორიაში ეჯიბრებოდნენ - ფიზიკის, მათემატიკის, სიცოცხლის, გარე სამყაროსა და კომპიუტერული მეცნიერებების.
წელს 200-მდე ახალგაზრდამ თავისი ნაშრომი ინგლისურ ენაზე წარმოადგინა კომპეტენტური ჟიურის წინაშე. საქართველოს ნაკრები ქართულ-ამერიკული სკოლისა და ქართულ-ამერიკული უმაღლესი სკოლის 10 მოსწავლისაგან შედგებოდა.
საქართველოს ნაკრებმა ექვსი საპროექტო ნაშრომი წარადგინა და მათგან ხუთმა გამარჯვება მოიპოვა:
ვერცხლის მედალი - თინათინ კამკამიძე და არჩილ გელენავა - სიცოცხლის მეცნიერებების კატეგორიაში;
ბრინჯაოს მედალი - მარიამ გიგაური - ფიზიკა;
ბრინჯაოს მედალი - მარიამ როსტომაშვილი - მათემატიკა;
ბრინჯაოს მედალი - მამუკა კობახიძე და დავით გუდაძე - მათემატიკა;
სპეციალური პრიზი - გიორგი ბუგეჩაშვილი და თინათინ ლაღაძე - მათემატიკა.
კონფერენციის დასასრულს, დასკვნით საღამოზე ყველა ქვეყანამ წარმოადგინა საკუთარი კულტურული ნომერი. ქართველების ცეკვამ გიტარის აკომპანირებით დიდი მოწონება დაიმსახურა.
ქართულ-ამერიკული სკოლისა და ქართულ-ამერიკული უმაღლესი სკოლის მოსწავლეები მაისის თვეში ამერიკაში დაიცავენ საქართველოს ღირსებას. წელს INTEL ISEF კალიფორნიის დედაქალაქ ლოს-ანჯელესში გაიმართება.