პრემიერ-მინისტრ გიორგი გახარიას თქმით, რეგიონებში შეხვედრები ყოველთვის პედაგოგებით დაიწყება.
მთავრობის მეთაურმა რეგიონებში სხვადასხვა სფეროს წარმომადგენლებთან შეხვედრები შიდა ქართლით, გორით დაიწყო, სადაც გორის სამხატვრო სკოლის შენობაში პირველი შეხვედრა მასწავლებლებთან გამართა. შეხვედრაზე მან მთავრობის პრიორიტეტებზე გაამახვილა ყურადღება, მათ შორის განათლების სფეროსა და 2020 წლის ბიუჯეტზე ისაუბრა.
როგორც გიორგი გახარიამ აღნიშნა, არ არის შემთხვევითი, რომ მან რეგიონებში გასვლა შიდა ქართლით, სწორედ პედაგოგებთან შეხვედრით დაიწყო.
„არ არის შემთხვევითი ის, რომ რეგიონებში გასვლას ვიწყებთ შიდა ქართლით, გორით და, რა თქმა უნდა, არ არის შემთხვევითი, რომ გორში პირველ შეხვედრას ვიწყებთ პედაგოგებთან და ზოგადად, საგანმანათლებლო სექტორთან. ამას თავისი ახსნა აქვს. მე სასიამოვნოდ გაკვირვებული ვიყავი, როდესაც ვნახე, როგორი წარმატებული მონაცემები გაქვთ გორში, განსაკუთრებით საშუალო განათლების ნაწილში, რამდენი მედალოსანი და წარმატებული ახალგაზრდა გყავთ. პირველ რიგში, ეს თქვენი დამსახურებაა“, - განაცხადა მთავრობის მეთაურმა.
პრემიერმა ასევე განაცხადა, რომ ფასეულობების დონეზე, იმას რასაც აკეთებენ პედაგოგები, მედიკოსები და პოლიციელები, განსაკუთრებით გორში, მაშინ, როდესაც საოკუპაციო ხაზთან ვდგავართ, კრიტიკული მნიშვნელობა აქვს.
„ბოლო პერიოდში ძალიან გვაკრიტიკებენ ბიუჯეტის შედგენის გამო, სადაც ძალიან მკაფიოდ განვსაზღვრეთ რამდენიმე ფუნდამენტური პრიორიტეტი. ეს პრიორიტეტი არის პირველ რიგში ბავშვები, ახალგაზრდა თაობა, ასევე ჩვენი პენსიონერები, რომლებიც ძალიან ღვაწლმოსილი ადამიანები არიან. ასევე სახელმწიფო აპარატი, რომელიც ამ სოციალურ ჯგუფებს ემსახურება, რა თქმა უნდა, პირველ რიგში ეს არიან მასწავლებლები, მეორე რიგში, ჩვენი მედიკოსები და, რა თქმა უნდა, ყველაფერს ამას კრავს პოლიცია.
უაღრესად მნიშვნელოვანია ეკონომიკის სხვადასხვა სფეროებში მომუშავე ადამიანები, მათ შორის ბიზნესში, რომლებიც სამუშაო ადგილებს ქმნიან, თუმცა ჩვენ ყველას კარგად გვესმის, რომ ფასეულობების დონეზე, იმას რასაც აკეთებენ პედაგოგები, მედიკოსები და პოლიციელები, განსაკუთრებით გორში, მაშინ, როდესაც საოკუპაციო ხაზთან ვდგავართ, კრიტიკული მნიშვნელობა აქვს“, - განაცხადა პრემიერ-მინისტრმა.
გიორგი გახარიამ მასწავლებლებთან შეხვედრაზე განათლების რეფორმაზე საუბრისას აღნიშნა, რომ განათლება არის ქვეყნის სისტემური პრობლემა.
„ძალიან კარგად გვესმის, რომ განათლება არის ჩვენი სისტემური პრობლემა, რომლის გადასაწყვეტადაც იყო დაწყებული განათლების სისტემური რეფორმა. არ მინდა ზედმეტი სიტყვები ვთქვა იმაზე, რომ ჩვენ ამ რეფორმას გავაგრძელებთ და მივიყვანთ ბოლომდე. ისიც ძალიან კარგად გვესმის, რომ განათლების სისტემური რეფორმა არ არის ის რეფორმა, რომელიც ერთ ან ორ წელიწადში ხელშესახებ შედეგს მოგვცემს, თუმცა ყველას უნდა გვესმოდეს, რომ უნდა ვგრძნობდეთ და ვხედავდეთ ყოველდღიურ პროგრესს. ყოველდღიურ პროგრესს როგორც ჩვენი პედაგოგების სოციალური პირობების, მათი კომპეტენციის და მათი გარემოს გაუმჯობესების, ასევე ჩვენი მოსწავლეებისა და სტუდენტების მაღალი მიღწევების თვალსაზრისით“, - განაცხადა გიორგი გახარიამ.
