საქართველოში სწავლის გაგრძელების მსურველებისთვის გამოცდის ჩატარების დრო შეიცვალა
28-01-2020
შეფასებისა და გამოცდების ეროვნული ცენტრის ინფორმაციით, საქართველოში სწავლის გაგრძელების მსურველებისთვის გამოცდის ჩატარების დრო შეიცვალა.
ცენტრის განცხადებით, საქართველოში სწავლის გაგრძელების მიზნით 24 იანვრის ჩათვლით დარეგისტრირდნენ შეფასებისა და გამოცდების ეროვნულ ცენტრში, ტესტირება 5 თებერვლის 15:00 საათზე (ნაცვლად 10:00 საათისა) ჩატარდება.
მისამართი: თ. იოსებიძის N50 - ქ. თბილისის N161 სკოლის შენობა.
საგამოცდო ცენტრში აპლიკანტი რეგისტრაციის გასავლელად 14:30 საათზე უნდა გამოცხადდეს და თან უნდა იქონიოს: პირადობის დამადასტურებელი დოკუმენტი ან პასპორტი. დაგვიანების შემთხვევაში, გამოსაცდელი ტესტირებაზე აღარ დაიშვება.
ტესტირების მიმდინარეობისას აპლიკანტს უფლება აქვს იქონიოს:
- წყალი (პლასტმასის ბოთლით);
- პირადი ჰიგიენის ნივთები;
- საჭიროების შემთხვევაში, სხვა ნივთები, ცენტრის თანხმობით.
ტესტურ დავალებაზე მუშაობის პროცესში აპლიკანტს ცენტრი უზრუნველყოფს შესაბამისი კალმით და სხვა საჭირო ნივთებით. ტესტირების ხანგრძლივობაა 2 საათი და 30 წუთი.
გთხოვთ გაითვალისწინოთ, რომ წარმოდგენილ ნიმუშში შეტანილია 7 დავალება ტესტის თითოეული ნაწილიდან:
წაკითხულის გააზრება - 7 დავალება;
ლოგიკური მსჯელობა - 7 დავალება;
რაოდენობრივი მსჯელობა - 7 დავალება.
გამოცდაზე თითოეულ ნაწილში შესასრულებლად გექნებათ 15 დავალება. ტესტი შედგება 45 არჩევითპასუხებიანი ტესტური დავალებისაგან. თითოეულ დავალებას აქვს 5 სავარაუდო პასუხი, რომელთაგან მხოლოდ ერთი არის სწორი. თითოეულ ტესტურ დავალებაზე გაცემული სწორი პასუხი ფასდება 1 ქულით, ხოლო არასწორი პასუხი - 0 ქულით.
გამოცდის წარმატებით ჩაბარება გულისხმობს ტესტისათვის განსაზღვრული მაქსიმალური ქულის 50%-ზე მეტის (მინიმუმ 23 ქულა) დაგროვებას.
ცენტრი გამოაქვეყნებს თავის ოფიციალურ ვებგვერდზე: www.naec.ge
ა) იმ აპლიკანტების სიას, რომელთაც წარმატებით ჩააბარეს გამოცდა;
ბ) იმ აპლიკანტების სიას, რომელთაც ვერ ჩააბარეს გამოცდა.
მონაწილემ, რომელმაც რეგისტრაციის დროს მიუთითა სპეციალური საჭიროების თაობაზე (ფუნქციონალური დარღვევები, გადამდები ინფექციური დაავადებები და სხვა), შესაბამისი სამედიცინო ცნობა (ფორმა №100) უნდა წარმოადგინოს ცენტრში 31 იანვრის 18:00 საათამდე.
ტესტირებისათვის ზედმეტად ან შეცდომით გადახდილი თანხის დაბრუნების თაობაზე განაცხადები მიიღება 29 იანვრიდან 28 თებერვლის ჩათვლით, მისამართზე: ე. მინდელის N9.
სკოლების სიახლეები
