ეროვნულმა ბანკმა სამოქალაქო განათლების პედაგოგთა გადამზადების პროექტი დაიწყო, რომელიც გერმანული შემნახველი ბანკების ფონდის (SBFIC) მხარდაჭერითა და სამოქალაქო განათლების პედაგოგთა ფორუმის ჩართულობით ხორციელდება.
პროექტის მიზანია, ეკონომიკურ-ფინანსური განათლების მიმართულებით პედაგოგთა პროფესიული განვითარების ხელშეწყობა, რაც საშუალებას მისცემს, მოსწავლეთა ასაკობრივი თავისებურებების გათვალისწინებით, დაგეგმონ და განახორციელონ ინტერაქტიული გაკვეთილები.
პროექტის ფარგლებში შემუშავდა ტრენინგ-მოდული, დამხმარე სასწავლო მასალა მასწავლებლებისთვის, განხორციელდა ტრენერთა ტრენინგი, რომელიც მარტში 300-მდე, ხოლო წლის ბოლომდე სამოქალაქო განათლების 600-მდე პედაგოგის გადამზადებას ითვალისწინებს.
მასწავლებელთა ტრენინგების შესახებ ინფორმაცია, როგორც განათლების სამინისტროს, ისე სამოქალაქო პედაგოგთა ფორუმის მიერ გავრცელდა და მასზე დარეგისტრირება შესაძლებელი იყო ნებისმიერი დაინტერესებული პედაგოგისთვის, რომელიც საგანს „მოქალაქეობა“ ასწავლის. 22-23 თებერვალს მასწავლებელთა პირველი ტრენინგი თბილისში გაიმართა. მომდევნო ტრენინგები კი ეტაპობრივად საქართველოს სხვადასხვა ქალაქში ჩატარდება.
ახალი ეროვნული სასწავლო გეგმა 2018 წელს დამტკიცდა, სადაც განათლების, მეცნიერების, კულტურისა და სპორტის სამინისტროსა და საქართველოს ეროვნული ბანკის აქტიური ურთიერთთანამშრომლობის შედეგად, ფინანსურ-ეკონომიკური განათლების საკითხები საბაზო საფეხურზე, საგანში „მოქალაქეობა“ გაერთიანდა.
ახალი გეგმის მიხედვით, სწავლება 2019-2020 სასწავლო წელს პირველად მე-7 კლასებში დაიწყო და მომდევნო წლებში ეტაპობრივად, საბაზო საფეხურის ზედა კლასებშიც გაგრძელდება. უშუალოდ ფინანსურ-ეკონომიკური საკითხების შესწავლას მოსწავლეები მიმდინარე წლის აპრილ-მაისიდან შეძლებენ.
სამოქალაქო განათლების მასწავლებლებისთვის განკუთვნილი დამხმარე სასწავლო მასალა მე-7 კლასის წლიურ პროგრამაში მოცემულ ყველა ეკონომიკურ-ფინანსურ საკითხს ფარავს, ასევე, მოიცავს ჯგუფურ სამუშაოებს, საკლასო აქტივობებსა თუ სხვა დავალებებს, რომლებიც სწავლების პროცესს უფრო საინტერესოსა და ინტერაქტიულს გახდის. აღნიშნული მასალის ელექტრონული ვერსია ეროვნული ბანკის ვებგვერდზეც აიტვირთება და მის გამოყენებას ყველა დაინტერესებული მასწავლებელი უფასოდ შეძლებს.
