2 მარტს პირველკლასელთა რეგისტრაცია იწყება. ახალი სასწავლო წლისთვის დარეგისტრირებას მხოლოდ ის ბავშვები შეძლებენ, რომლებსაც 6 წელი 15 სექტემბრის ჩათვლით უსრულდებათ. 16 სექტემბრიდან დაბადებული ბავშვები სკოლაში ვერ შევლენ, მათთვის კანონში არავითარი შეღავათი არ არის გაწერილი. 

etaloni.ge ამ საკითხზე მოქმედ დირექტორებს დაუკავშირდა. გთავაზობთ, მათ კომენტარებს:

ოზურგეთის N3 საჯარო სკოლის დირექტორი ნანა გაგუა:

ეს კანონი ვინც მიიღო, ალბათ, ამაზე ბევრი იფიქრა. თავდაპირველად, თითქმის არ ჩანს განსხვავება 5 და 6 წლის ბავშვებს შორის, თითქმის იგივე უნარები შეიძლება ჰქონდეთ, მაგრამ ეს სხვაობა თავს შემდეგ იჩენს ხოლმე. 6 წლის ბავშვები, როგორც წესი, უფრო კარგად სწავლობენ და ადრე შეყვანილი ბავშვები მერე ჩამორჩებიან, თუ მართლა განსაკუთრებულად ნიჭიერები არ არიან. მათ თამაშის მოთხოვნილება უფრო მეტად შეიძლება ჰქონდეთ, უფრო ინფანტილურები იყვნენ და ა.შ. 

მშობლებს პრობლემა აქვთ, როცა უკვე გარდამავალ ეტაპზეა ბავშვი, ბაღი არ იღებს მათ, არც სკოლა იღებს და არ იციან, სად წაიყვანონ. რაც სკოლაში ვმუშაობ, ეს პრობლემა სულ დგას. შესაძლოა ისე გაკეთდეს, რომ მშობლის არჩევანი რაღაცნაირად გაითვალისწინონ, თუმცა რაღაც ზღვარს ყოველთვის დააწესებს კანონი და ვიღაც მაინც გადასცდება იმ ზღვარს.

წყალტუბოს მუნიციპალიტეტის, ფარცხანაყანევის N3 საჯარო სკოლის დირექტორი ნარგიზა ნემსაძე:

ძალიან ინდივიდუალურ მიდგომას საჭიროებს ეს საკითხი. ზოგიერთმა 5 წლის ბავშვმა ძალიან ბევრი იცის და ზოგი 6 წლისაც პატარაა. საერთოდ მგონია, რომ რამდენიმე დღე არ უნდა წყვეტდეს და დეკემბრამდე დაბადებულ ბავშვებს ვიღებდეთ. ბაღი თუ გაუვლია ბავშვს, არ არის ხოლმე პრობლემა და თუ არ გაუვლია, ისედაც იქნება ეს შეფერხება.​ დაწყებითებში არ მიმუშავია, მაგრამ მესმის მასწავლებლებისა და მშობლების გულისტკივილი, რომ კარგი იყო 5-წლიანიო. მშობლებს უნდათ, რომ შეეძლოთ 5 წლის ბავშვებიც მიიყვანონ სკოლებში, მალე რომ უსრულდებათ 6 წელი, მათი საყვედურები უფრო მესმის.

ოზურგეთის N4 საჯარო სკოლის დირექტორი ტარიელ ნაკაიძე:

ვეთანხმები ამ კანონს, თუმცა ზოგჯერ მშობლები უკმაყოფილებას გამოთქვამენ, როცა ერთი ან ორი დღე აკლია ბავშვს 6 წლამდე. მაგრამ გამონაკლისს თუ დაუშვებ, მაშინ გამოდის, რომ ყველას უნდა გაუწიო შეღავათი. ადრე ვიღებდით, ვისაც 30 დეკემბრამდე  უსრულდებოდა 6 წელი, ფაქტობრივად, გამოდის, რომ 5 წლინახევრის ბავშვი უნდა მივიღოთ სკოლაში. სამწუხაროდ, მშობლებს არ ესმით, რომ ხელის მტევანი, აზროვნება, დამოკიდებულება, მზაობა სკოლისათვის ჯერ კიდევ არ აქვთ ამ ბავშვებს. უჭირთ გაკვეთილზე ყოფნა, შეიძლება ჩამოეძინოთ, დაიღალონ, ხშირად სურვილი აქვთ, გავიდნენ გაკვეთილიდან და იყვნენ არასაგაკვეთილო სიტუაციაში.

მესმის, რომ ბაღში დადის, პროგრამას გადის, რომ მშობელს დიდი სურვილი აქვს, მაგრამ, მოდით, ნუ დავაჩქარებთ ამ ბავშვებს და დავუჯეროთ კანონს.

ქედის მუნიციპალიტეტის, აქუცის საჯარო სკოლის დირექტორი ნონა დავითაძე:

არ მიმაჩნია მართებულად, რომ მხოლოდ 15 სექტემბერს დაბადებულ ბავშვებს შეეძლოთ პირველ კლასში შესვლა. მთელი 1 წელი ეკარგება ბავშვს, როცა ისედაც 12-წლიანი სწავლებაა. პირველ სემესტრში ვინც სრულდება 6-ის, ვფიქრობ, იმ ბავშვებისთვის უნდა დაიშვას გამონაკლისი. თუ ბავშვი ბაღში დადის, ეს განსხვავება არც შეიმჩნევა. არც სოციალიზაცია და არც სწავლა არ უჭირთ ასეთებს.

ოზურგეთის მუნიციპალიტეტის, შემოქმედის საჯარო სკოლის დირექტორი ნინო სადრაძე:

ჩემი აზრით, დეკემბრის ბოლომდე დაბადებულ ბავშვებს უნდა ვიღებდეთ. ვფიქრობ, სკოლის დაწყებას ამასთან კავშირი არ აქვს. 2-3 თვე გადამწყვეტი არ არის, რომ სასწავლო პროცესში ამ ბავშვებს შორის სხვაობა გამოჩნდეს. მე მქონდა გამოცდილება ოჯახში, როცა 16 სექტემბერს დაბადებული ბავშვი ვერ წავიდა სკოლაში და 14-ში დაბადებული დარეგისტრირდა. შეიძლება ვინმემ მითხრას, რომ 14 სექტემბერს დაბადებულს შეუძლია დაძლიოს პროგრამა და 16-ში დაბადებულს - არა? 


წყალტუბოს მუნიციპალიტეტის, დღნორისის საჯარო სკოლის დირექტორი გაიოზ ლომთაძე:

5 წლის ბავშვი ძალიან პატარაა და არაა მზად სკოლისთვის. კანონიერი მგონია, რომ 15 სექტემბრამდე იყოს ზღვარი. რასაც პრაქტიკიდან ვხედავ, 5 წლის ბავშვი თავისი განვითარებით ვერ დაძლევს სასწავლო პროგრამას, მით უმეტეს, უცხო ენაც შემოდის პირველ კლასში. მშობლები აპროტესტებენ ხოლმე, როცა მალე უსრულდებათ ბავშვებს 6 წელი, რამდენიმე დღის გამო ვკარგავთ წელსო. ასეთ დროს გამონაკლისი რომ დაუშვას სამინისტრომ, კარგი იქნება. თუმცა არც ის მგონია დიდი უხერხულობა, რომ დაიცადონ და მომავალ წელს დაიწყონ სწავლა.

დედოფლისწყაროს მუნიციპალიტეტის, ფიროსმანის საჯარო სკოლის დირექტორი იოსებ ბიბინიძე:

5 წლის ბავშვები ძალიან პატარები არიან, ნამდვილად არ უნდა მივიღოთ. მათ უნდათ თავის დროზე ძილი. ზღვარს თუ იტყვი ოქტომბრის ბოლომდე, პირველ ნოემბერს დაბადებულმა რა დააშავა? მესმის, რომ გააჩნია ბავშვის ფიზიკურ და გონებრივ განვითარებას და წარმატებას ასე ვერ განვსაზღვრავთ, მაგრამ სადღაც ზღვარი ხომ უნდა დაწესდეს?! მშობლების დიდი სურვილია, 5 წლის შვილებიც შეიყვანონ სკოლაში. განსაკუთრებით ისინი აპროტესტებენ ამ კანონს, ვისი შვილებიც სექტემბრის ბოლოს ხდებიან 6-ის.

ბაღდათის N1 საჯარო სკოლის დირექტორი მერაბ ფურცელაძე:

31 დეკემბრამდე დაბადებულებსაც უნდა იღებდეს, ჩემი აზრით, სკოლა. 6 წლის თუ არ არის ბავშვი, წლებია აღარ ვღებულობთ, ამიტომ ვერ გეტყვით, რამე სხვაობა თუა უფროსებთან, მაგრამ ადრე არ იყო არავითარი პრობლემა. 2-3-თვიანი სხვაობა არ მგონია, გადამწყვეტი იყოს. მშობლების დიდი სურვილია, რომ 5 წლის ბავშვებიც შედიოდნენ პირველ კლასში, ბევრი მშობელი გავაბრუნეთ უკან.

დედოფლისწყაროს მუნიციპალიტეტის, საბათლოს საჯარო სკოლის დირექტორი გენადი ჩოვუშიანი:

დიდი სხვაობა თუ არ არის, 15-20 დღე, ვფიქრობ, არ არის დარღვევა. ჩემი დაკვირვებით, 5-წლიანებს უჭირთ სწავლა, მაგრამ სექტემბერ-ოქტომბერში ვინც ხდება 6-წლის, იმათ უნდა ვიღებდეთ, რადგან ეს არ არის დიდი სხვაობა.