სიქთარვის სკოლის ინგლისური ენისა და ლიტერატურის მასწავლებელი სოფო ვაშაკიძე 2018 წლის ზაფხულში კვალიფიკაციის ასამაღლებლად ამერიკაში გაემგზავრება.

მასწავლებელთა დახელოვნების პროგრამა (TEA) ევრაზიისა და სამხრეთ აზიის საშუალო სკოლის მასწავლებლებს უნიკალურ შესაძლებლობას აძლევს, აიმაღლონ კვალიფიკაცია, დახვეწონ სწავლების უნარები და გაიღრმავონ ცოდნა ამერიკის შეერთებული შტატების შესახებ.

აღნიშნული პროგრამით, ოთხეტაპიან კონკურსზე საქართველოდან ამერიკაში გასამგზავრებლად ორი მასწავლებელი შეირჩა. ერთ-ერთია სიქთარვის სკოლის მასწავლებელი.

სკოლის პედაგოგიური კოლექტივი ულოცავს სოფო ვაშაკიძეს ამ წარმატებას. როგორც ისინი აღნიშნავენ, ამაყობენ თავიანთი მასწავლებლით.

ევრაზიის/სამხრეთ აზიის მასწავლებელთა დახელოვნების პროგრამა (TEA) წარმოადგენს ამერიკის შეერთებული შტატების სახელმწიფო დეპარტამენტის განათლებისა და კულტურის ბიუროს პროგრამას, რომელსაც ადმინისტრირებას უწევს საერთაშორისო კვლევისა და გაცვლების საბჭო (IREX).