სკოლის დირექტორთა საბჭო ახალი წევრებით გააგრძელებს მუშაობას. ახალ შემადგენლობაში სამი თვის განმავლობაში თავის ადგილს დაიკავებს ბარდნალის სკოლის დირექტორი მთვარისა ახვლედიანი.
აღსანიშნავია, რომ იგი მაღალმთიანი რეგიონებიდან ასარჩევ ორ კანდიდატს შორის მოხვდა. ''შანსები არც თუ ისე მაღალი იყო. დირექტორთა საბჭოს არჩევნებში გამარჯვება ამბროლაურის, ონის, ლენტეხისა და ცაგერის მუნიციპალიტეტების სკოლების დირექტორების დამსახურებაა'', - აღნიშნავს მთვარისა ახვლედიანი.
ახალი სტატუსის ფარგლებში ქალბატონი მთვარისა საბჭოს სხვა წევრებთან ერთად სისტემატურად შეხვდება განათლებისა და მეცნიერების მინისტრს ალექსანდრე ჯეჯელავას და ზედა დონის მენეჯმენტს, რათა უფრო აქტიური გახდეს თანამშრომლობა და ინფორმაციის გაცვლა სკოლებსა და სამინისტროს შორის.
რა საკითხების განხილვას აპირებს ბარდნალის სკოლის დირექტორი განათლებისა და მეცნიერების მინისტრთან და როგორია მისი გეგმები, შეიტყვეთ ჩვენი ინტერვიუდან.
- ქალბატონო მთვარისა, მაღალმთიანი რეგიონებიდან დირექტორთა საბჭოს წევრად მხოლოდ ორი კანდიდატი უნდა არჩეულიყო. ერთ-ერთი თქვენ ხართ. ელოდით თუ არა?
- გულწრფელად რომ ვთქვა, მქონდა ჩემი კოლეგების მხარდაჭერის იმედი, რადგან ამ სფეროში მუშაობის დიდი გამოცდილებითა და აქტიური საქმიანობით მეტ-ნაკლებად ჩვენი რეგიონის ოთხივე მუნიციპალიტეტის სასკოლო საზოგადოება მიცნობს.
- რა კრიტერიუმების საფუძველზე მოხდა შერჩევა?
- რა თქმა უნდა, ამ სისტემაში მუშაობის გამოცდილებისა და პიროვნული მახასიათებლების გათვალისწინებით. თქვენი საშუალებით კიდევ ერთხელ გადავუხდი მადლობას ამბროლაურის, ონის, ლენტეხისა და ცაგერის მუნიციპალიტეტების სკოლების დირექტორებს, რომლებმაც ჩემში დაინახეს მაღალმთიანი რეგიონების სკოლების პრობლემებში ჩახედული და მისი მოგვარების გზების მაძიებელი პიროვნება და ნდობა გამომიცხადეს.
- საბჭოს წევრობა დიდ შესაძლებლობებს გაძლევთ. განათლებისა და მეცნიერების სამინისტროს შეგიძლიათ პირადად გააცნოთ თქვენს სკოლაში, რეგიონში არსებული სიტუაცია. თუ შეიძლება, რომ გაგვაცნოთ თქვენი გეგმები ამ მიმართულებით.
- დღევანდელი სკოლა, თანამედროვე მოთხოვნებს რომ უპასუხოს, დიდი გამოწვევების წინაშე დგას. პრობლემები მაღალმთიანი რეგიონების სკოლებში საკმაოდაა; მიუხედავად იმისა, რომ ჩვენი კურსდამთავრებულები საკმაოდ მაღალ შედეგებს აჩვენებენ ერთიან ეროვნულ გამოცდებში, ასევე ''საქართველოს ეტალონი მოსწავლე'' ამ ბოლო წლებში ორჯერ ჩვენი მუნიციპალიტეტის მცირეკონტიგენტიანი სკოლებიდანაა (ბარდნალისა და ლაილაშის), სკოლებში ჯერ კიდევ პრობლემად რჩება კვალიფიციური კადრების ყოლა ყველა საგანში, ასევე ახალგაზრდა კადრების დეფიციტი; სკოლის დირექციების სამართლიან გულისწყრომას იწვევს ის ფაქტი, რომ მთის კანონით გათვალისწინებული შეღავათები გავრცელდა მხოლოდ პედაგოგებზე, მაგრამ არა დირექციებზე. ვეცდები, არსებულ პრობლემებზე ღიად და დაუფარავად ვისაუბრო, გავიზიარო კოლეგების მოსაზრებები, მათთან ერთად ვეძებო ამ და სხვა პრობლემების მოგვარების გზები და ეს სამთვიანი პერიოდი გამოვიყენო ნაყოფიერი საქმიანობისათვის.
