ბორჯომის მუნიციპალიტეტის სკოლებში საქართველოს ეროვნული ინტელექტ-ჩემპიონატ „ეტალონის“ 2020 წლის სეზონის I ეტაპის ტესტირება ჩატარდა.
როგორ მიმდინარეობდა ტესტირება სხვადასხვა სკოლაში? რამდენად აქტიურად ჩაერთვნენ მოსწავლეები ინტელექტ-ჩემპიონატში და რამდენად კმაყოფილები არიან შედეგებით სკოლის დირექტორები? ამის გასარკვევად etaloni.ge ბორჯომის მერიის წარმომადგენელს, დირექტორებსა და „ეტალონის“ პედაგოგებს დაუკავშირდა:
ბორჯომის მერიის წარმომადგენელი მარინა ხუჯაძე:
„როგორც ყოველთვის, ძალიან აქტიურად ჩაიარა „ეტალონის“ პირველმა ტურმა, მოსწავლეები მოლოდინის რეჟიმში იყვნენ, მათ ძალიან უყვართ და მოსწონთ ეს პროექტი. პირველი ტურის შედეგად შეირჩა 73 მოსწავლე, რომლებიც გადავიდნენ მეორე ტურში. მეორე ტური დაგეგმილია ოქტომბერს და ის ჩატარდება ბორჯომის N3 საჯარო სკოლის სპორტ-დარბაზში, რა თქმა უნდა, ყველანაირი წესით და რეგულაციის დაცვით“.
ტაბაწყურის საჯარო სკოლის დირექტორი და „ეტალონის“ პედაგოგი ლელი აკოფოვი:
„მოსწავლეთა ჩართულობა იყო ძალიან კარგი. შედეგებიდან გამომდინარე, 3 მოსწავლე მეორე ტურში გადავიდა. „ეტალონი“ ძალიან მოსწონთ ბავშვებს და ჩვენც, მუდმივად გავაგრძელებთ პროექტში ჩართულობას, რადგან მოსწავლეები ძალიან კმაყოფილები არიან“.
ტაძრისის საჯარო სკოლის დირექტორი ზაზა გოგოლაძე:
„მოსწავლეთა მოტივაცია იყო საკმაოდ მაღალი, რაც დაადასტურა მოსწავლეთა აქტიურობამ, შედეგებიც საკმაოდ ნორმალური იყო, საუკეთესო არა, მაგრამ კარგი შედეგები აჩვენეს ბავშვებმა. რა თქმა უნდა, ეს ყველაფერი მოსწავლეთა მოტივაციის ამაღლებაზე დადებითად მოქმედებს. იყო კატეგორია, რომელმაც პირველად მიიღო მონაწილეობა და უფრო ღელავდნენ. დადებითად შევაფასებ „ეტალონს“, სამამულიშვილო საქმეა და პროექტის გაგრძელებითა და მასში ჩვენი ჩართულობით ყოველთვის მოხარულები ვიქნებით“.
ტაძრისის საჯარო სკოლის „ეტალონის“ პედაგოგი ლილი შაყულაშვილი:
„ძალიან გვიხარია რომ „ეტალონი“ კვლავ გრძელდება. ჩვენი სკოლიდან ტესტირებაში ჩართული იყო 29 მოსწავლე. დაინტერესება მაღალი იყო. მე-8 კლასელებმა პირველად მიიღეს მონაწილეობა და შედარებით დაბალი შედეგი ჰქონდათ, თუმცა ვფიქრობ უფრო მეტად ნერვიულობის გამო იყო ეს. მოსწავლეები დიდი ინტერესით ელიან მეორე ტურს“.
ანდეზიტის საჯარო სკოლის დირექტორი ზოია თიგიშვილი:
„ეტალონი“ არის შესანიშნავი. სულ ვართ ჩართულები და მადლობა ამისთვის პირველ რიგში, „ეტალონს“, შემდეგ - ბავშვებს. მოსწავლეთა მოტივაცია მაღალი იყო, ობიექტურად ჩავატარეთ. მონაწილე მოსწავლეები ძალიან მონდომებულები არიან. ტესტირებისთვის ცდილობენ წინასწარ მოემზადონ ხოლმე, გულით უხარიათ ტესტირების დღე“.
ანდეზიტის საჯარო სკოლის „ეტალონის“ პედაგოგი ნათელა გელაშვილი-დუგაროვი:
„მოსწავლეთა მოტივაცია ძალიან მაღალი იყო, მათ ყოველთვის უხარიათ „ეტალონის“ პროექტში ჩართვა. ტესტირებას ყოველთვის სიხარულით ელოდებიან. მე-8 კლასელებმა თავი გამოიჩინეს. კმაყოფილი ვარ, პირველი იყო მათთვის წლევანდელი წელი. მადლობელი ვარ „ეტალონის“, რომ ასეთ ყურადღებას იჩენს ჩვენ მიმართ“.
ანდეზიტის საჯარო სკოლის „ეტალონის“ პედაგოგი ლალი ხუციშვილი:
„ჩვენს სკოლაში მოსწავლეთა აქტივობა იყო ძალიან მარალი. ტესტირებაში აქტიურად ჩაერთვნენ მე-8 და მე-9 კლასის მოსწავლეები თითქმის სრული შემადგენლობით. კმაყოფილები ვართ შედეგებით. მე-8 კლასის 2 მოსწავლე გადავიდა შემდეგ ტურში. მოსწავლეები ყოველთვის ხალისით და მონდომებით ხვდებიან „ეტალონის“ ყველა კონკურსს. ჩვენ წლებია პროექტში ვმონაწილეობთ, ჩვენი სკოლა მცირეკონტიგენტიანია, თუმცა მოსწავლეები ყოველთვის აქტიურად არიან ჩართულები“.
II ეტაპზე გადასული მოსწავლეები ერთმანეთს „ბორჯომის ეტალონი მოსწავლის“ ტიტულის მოპოვებაში შეეჯიბრებიან.
შეგახსენებთ, რომ „ეტალონი“ საქართველოს განათლების, მეცნიერების, კულტურისა და სპორტის სამინისტროსა და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროების მიერ გაცემული რეგულაციების შესაბამისად, ეპიდსიტუაციიდან გამომდინარე, ეწვევა მუნიციპალიტეტებსა და თვითმმართველ ქალაქებს და ტრადიციულად, „ეტალონელ მოსწავლეებს“ გამოავლენს.
იხილეთ ფოტოები
ბორჯომის სკოლების მოსწავლეთა საყურადღებოდ - ეტალონი
