ზოგადსაგანმანათლებლო დაწესებულების სახელმძღვანელოს/სერიის გრიფირების წესში ცვლილება შევიდა.
განათლების, მეცნიერების, კულტურისა და სპორტის მინისტრის მიხეილ ჩხენკელის ბრძანებით, თუ დადგენილ ვადებში სკოლა ვერ შეარჩევს გრიფირებულ სახელმძღვანელოს, მაშინ რესურსცენტრი იღებს გადაწყვეტილებას რომელი წიგნი შევიდეს სკოლაში.
„იმ შემთხვევაში, თუ სკოლის მიერ არ/ვერ განხორციელდა შესაბამის ვადაში სახელმძღვანელოს/სერიის არჩევა, სკოლის მიმართვის საფუძველზე სამინისტროს ტერიტორიული ორგანო - საგანმანათლებლო რესურსცენტრი (შემდგომში − რესურსცენტი) ახორციელებს არჩევანის დაფიქსირებას ზოგადი განათლების მართვის საინფორმაციო სისტემაში“, - აღნიშნულია ბრძანებაში.
ბრძანებაში ჩაიწერა, რომ ნებისმიერი დაინტერესებული პირს აქვს უფლება სახელმძღვანელოს/სერიის მაკეტის საჯარო სივრცეში გაცნობისა და არგუმენტირებული შენიშვნა ან/და მოსაზრება გამოხატოს.
ამასთან, განათლების სამინისტროს თანხმობით, სკოლას შეუძლია შეცვალოს არეული გრიფირებული სახელმძღვანელო სხვა, ალტერნატიული გრიფმინიჭებული სახელმძღვანელოთი.
სკოლა ასევე უფლებამოსილია, უცხოური ენების სწავლებისას, შესაბამისი კლასის საჭიროებიდან გამომდინარე, გამოიყენოს განსხვავებული კლასის სახელმძღვანელოები. სკოლა, განსხვავებული კლასის სახელმძღვანელოების შესახებ ინფორმაციას ასახავს ზოგადი განათლების მართვის საინფორმაციო სისტემაში გრიფმინიჭებული სერიის შერჩევისთვის დადგენილ ვადაში.
თითოეულ საგანში შინაარსობრივ რეცენზირებაში საუკეთესო შედეგების მქონე გრიფმინიჭებული სახელმძღვანელო/სერია შესაძლებელია ითარგმნოს რუსულ, სომხურ და აზერბაიჯანულ ენებზე არაქართულენოვანი სკოლების/სექტორების მოსწავლეებისთვის/მასწავლებლებისათვის.
