დაწყებითი განათლების მასწავლებლები, სკოლების ადმინისტრაციისა და განათლების სისტემის თანამშრომლები დისტანციური სწავლის შესახებ გადამზადების კურსს გაივლიან. 100 სკოლას მოიცავს პროექტი, რომელიც განათლების, მეცნიერების, კულტურისა და სპორტის სამინისტროს, ესტონეთის მთავრობისა და გაეროს ბავშვთა ფონდის ფარგლებში განხორციელდება.
დაწყებითი განათლების მასწავლებლები გაივლიან მომზადებას კომპეტენციებზე დაფუძნებულ სწავლისა და სწავლების მეთოდოლოგიაში.
სკოლების ადმინისტრაციების წარმომადგენლები და ადგილობრივი საგანმანათლებლო რესურსცენტრების წარმომადგენლები გაივლიან ტრენინგს საგანმანათლებლო გარემოსა და სკოლის მენეჯმენტში.
მონაწილე სკოლები შეიძენენ გამოცდილებას სხვადასხვა პლატფორმების შექმნასა და მართვაში ცოდნის, პრაქტიკისა და თანამშრომლობის იდეების გასაზიარებლად.
პროგრამა 2020 წელს დაიწყო და 2 წელი გაგრძელდება.
პროგრამა დაფარავს 100 საჯარო სკოლას ქვეყნის მასშტაბით, მათ შორის სკოლებს რთულად მისადგომ და მთიან რეგიონებში და მიზნად ისახავს მასწავლებლებისთვის დისტანციური სწავლების ესტონური გამოცდილების გაზიარებას მათი პროფესიული განვითარებისთვის.
განათლების, მეცნიერების, კულტურისა და სპორტის მინისტრის მოადგილემ, ეკატერინე დგებუაძემ აღნიშნა, რომ პროექტი განათლების სექტორში კვალიფიციური კადრების მომზადებას, მათი უნარებისა და ცოდნის განვითარებას შეუწყობს ხელს.
გაეროს ბავშვთა ფონდის წარმომადგენელმა საქართველოში ღასან ხალილმა კი აღნიშნა, რომ კორონავირუსის პანდემიის შედეგად სკოლების დაკეტვამ მნიშვნელოვნად შეაფერხა ბავშვების განათლების პროცესი.
„გაეროს ბავშვთა ფონდი განაგრძობს მასწავლებლების და მოსწავლეების მხარდაჭერას დისტანციური სწავლებისთვის საჭირო უნარების და რესურსების მიწოდებით, რადგანაც სწორედ დისტანციური განათლებაა დღეისათვის განათლების მიღების უპირატესი გზა. გაეროს ბავშვთა ფონდსა და ესტონეთის მთავრობას შორის თანამშრომლობას უკვე სერიოზული შედეგები აქვს და საქართველოს მთავრობასთან პარტნიორობით ჩვენ შევძლებთ უკეთეს აკადემიურ შედეგებს მივაღწიოთ ბავშვებში“, - აღნიშნა ღასან ხალილმა.
