მასწავლებლების ტესტირება COVID-19-ზე დაიწყო. როგორც აჭარის განათლების სამინისტროში etaloni.ge-ს განუცხადეს, 1 თებერვლამდე რეგიონში 9 ათასამდე პედაგოგი გაიტესტება.
როგორც ცნობილია, საკოორდინაციო საბჭოს გადაწყვეტილებით საქართველოს მასშტაბით თბილისის, ქუთაისისა და რუსთავის გარდა, 1 თებერვალს სწავლა ყველა სკოლაში საკლასო ოთახიდან წარიმართება.
აჭარაში სკოლები და საგანმანათლებლო დაწესებულებები თითქმის ერთი წელია დისტანციურად სწავლობენ. კლასებში სასწავლო პროცესის განახლებასთან დაკავშირებით აჭარის განათლების მინისტრი მაია ხაჯიშვილი სკოლის დირექტორებს შეხვდა და როგორც მან აღნიშნა, მკაცრად იქნება დაცული სამედიცინო პროტოკოლი, მოხდება მასწავლებელთა სისტემატური ტესტირება 2 კვირაში ერთხელ.
მასწავლებელთა ტესტირების პროცესში თბილისის, რუსთავისა და ქუთაისის სასკოლო საზოგადოება პირველ მარტამდე ჩაერთვება, ანუ მანამდე ვიდრე აღნიშნულ ქალაქებში სასწავლო პროცესი სკოლებში განახლდება.
