ნანა არაბული, მარნეულის მუნიციპალიტეტის, კირიხლოს საჯარო სკოლის პედაგოგი:
- სიახლეს ვერ მოვიწონებთ, რადგანაც პირველ რიგში, ინტერნეტის პრობლემაა, ზოგჯერ მასწავლებელს უწევს შეფასების ცალკე ჩანიშვნა და შემდეგ ელექტრონულ ჟურნალში გადატანა, ეს კი დამატებით დროს საჭიროებს; გარდა ამისა, არ ჩანს პირველი სემესტრი... არის გარკვეული საკითხები, რაც ქმნის პრობლემას და იმედია, ეს ხარვეზები მალე გამოსწორდება.
გუმბატ გუსეინოვი, მარნეულის მუნიციპალიტეტის, ყულარის საჯარო სკოლის დირექტორი:
- ჯერჯერობით, ჩვენი სკოლა არ გადასულა ელექტრონული ჟურნალის წარმოებაზე, რადგანაც სკოლაში რემონტი მიმდინარეობს, ვართ სხვა შენობაში და აქედან გამომდინარე, კონკრეტული შეფასებების გაკეთება ცოტა მიჭირს. ვნახოთ, რემონტი რომ დასრულდება და მშობლიური სკოლის შენობაში დავბრუნდებით, როგორ შევძლებთ მუშაობას ელექტრონულ პლატფორმაზე.
ამაიაკ მიქაელიანი, ნინოწმინდის მუნიციპალიტეტის, დიდი გონდრიოს საჯარო სკოლის დირექტორი:
- ჩვენს სკოლაში ელექტრონული უკვე დავნერგეთ, მართალია, არის გარკვეული ხარვეზები თუმცა იმედია, ყველაფერი გასწორდება და ახალი, ელექტრონული რესურსი მალე დაიმკვიდრებს ღირსეულ ადგილს სასკოლო ცხოვრებაში.
არკადი მანუჩარიანი, მარნეულის მუნიციპალიტეტის, ოფრეთის საჯარო სკოლის დირექტორი:
- ამ ეტაპზე, ორივე სახის ჟურნალს ვაწარმოებთ, თუმცა დასწრებული სწავლებისას, რა საჭიროა ელექტრონული ჟურნალი, ცოტა ბუნდოვანია. სავალდებულოდ, შემოღების შემთხვევაში, რა თქმა უნდა, ჩვენც აქტიურად ჩავერთვებით მის წარმოებაში, მაგრამ ვიცი, ძალიან გაგვიჭირდება - ინტერნეტის დაბალი სიხშირე ბევრ წინააღმდეგობას ქმნის.
მუხამედ ხალილოვი, გარდაბნის მუნიციპალიტეტის, ყარაჯალას საჯარო სკოლის დირექტორი:
- გადასულები ვართ ელექტრონული ჟურნალის გამოყენებაზე და თავიდან, ასაკოვან პედაგოგებს ცოტა გაუჭირდათ ადაპტირება, თუმცა ახლა, უკვე, ყველამ შეისწავლა, ერთმანეთს გამოცდილებასაც უზიარებენ და ძალიან მოგვწონს, რადგანაც ვფიქრობ, რომ ძველი ჟურნალების ტარებას კლასებში და მერე მასზე პასუხისმგებლობის აღებას, ელექტრონული ჟურნალი სჯობს, რომლის წარმოებაც ბევრად მარტივია და კომფორტული.
