როგორ მიმდინარეობს სასწავლო პროცესი, რას ფიქრობს კომპლექსურ დავალებებთან და სწავლების ამ ფორმატთან დაკავშირებით, როგორია ვაქცინირებულ პედაგოგთა რაოდენობა, ამ და სხვა საკითხებთან დაკავშირებით Etaloni.ge-სთან ახალციხის მუნიციპალიტეტის სოფელ პატარა პამაჯის საჯარო სკოლის დირექტორი სოფია მანუკიანი საუბრობს.

- როგორ მიმდინარეობს თქვენ სკოლაში სასწავლო პროცესი ? ამ ეტაპისთვის სწავლების რომელ ფორმაზე ხართ (დასწრებითი, დისტანციური თუ ჰიბრიდული) ? როგორია მოსწავლეთა და მშობელთა განწყობა არსებული ეპიდვითარების გათვალისწინებით ?

- ჩვენს სკოლაში სწავლა დასწრებითი ფორმატით 4 ოქტომბერს განახლდა და დღემდე დასწრებითი რეჟიმით ვმუშაობთ. არც მშობლებს და არც მოსწავლეებს ამასთან დაკავშირებით პრეტენზია არ აქვთ. სწავლა ვითარდება რეგულაციების დაცვით და საგანმანათლებლო რესურსცენტრის დროდადრო შემოწმებით.

-  ხშირად აზრთა სხვადასხვაობაა კომპლექსური დავალებების საკითხზე. თქვენ რამდენად მოგწონთ დავალებების ეს ფორმატი ? მასწავლებლებს ? მშობლების დამოკიდებულება როგორია სწავლების მსგავსი მეთოდის მიმართ ?

- კომპლექსური დავალება ჩვენი სკოლისთვის ახალია, ახლა შემოდის სკოლაში და ესეც გრძელვადიანი ტრენინგების მეშვეობით. იმედია დროდადრო გავერკვევით მასში. ისე ძალიან ტევადია და დროის მომთხოვნი. იმედია მომავალში ავითვისებთ.

- პანდემიიდან გამომდინარე მიმდინარე სასწავლო წელს ძირითადად რა სახის აქტივობა-ღონისძიებებითაა თქვენი სკოლა დატვირთული ?

- აქტივობები აქტიურად მიმდინარეობს საკლასო ოთახებში, ტარდება ჩვეულებრივი ფორმატით ღონისძიებებიც, ოღონდ საკლასო ოთახებში მარტო მოსწავლეთათვის, რეგულაციების დაცვით.

- როგორც მშობლები აღნიშნავენ, არსებული სიტუაციის და მისგან გამომდინარე გაცდენებისა თუ სწავლების ფორმატის გათვალისწინებით მოსწავლეებს ხშირად ექმნებათ სასწავლო პროგრამის ათვისების სირთულე. რამდენად ემხრობით (ან აპირებთ) მსგავს შემთხვევებში სასწავლო დღედ გამოყენებული იქნას შაბათი დღე ?

- ჩვენ ასეთი პრობლემა არ გვაქვს, არც გაცდენებს ვუჩივით.

- როგორია თქვენ სკოლაში აცრილ მასწავლებელთა (სასკოლო საზოგადოების) პროცენტულობა და თუ ფლობთ ინფორმაციას მშობლების ვაქცინაციის მაჩვენებლის შესახებ ?

- ამჟამად სკოლაში 3 აცრილი მასწავლებელია. რაც შეეხება მშობლებს - ნებაყოფლობითია.