განათლებაში მიმდინარე სიახლეებზე წარმატებული სკოლების დირექტორების აზრი განსაკუთრებით მნიშვნელოვანია. ამ მიზნით etaloni.ge ასპინძის მუნიციპალიტეტის სოფელ ორგორის საჯარო სკოლის დირექტორს, ნელი ნათენაძეს დაუკავშირდა და სხვადასხვა აქტუალურ საკითხზე მისი კომპეტენტური აზრი მოისმინა.

- როგორ ფიქრობთ, რამდენად მიმზიდველია ახალგაზრდა თაობისთვის პედაგოგის პროფესია და რატომ ? 

- ვფიქრობ, რომ ახალგაზრდებისათვის მასწავლებლის პროფესია მიმზიდველია; სწავლის სწავლება, მუდმივი ძიება, ახალი მეთოდები, ინოვაციები მათთვის საინტერესოა და მიმზიდველი; ისინიც ხომ მუდმივ ძიებაში არიან.

- თქვენი აზრით რამდენად არის განათლების სისტემაში კადრების დეფიციტი ? 

- ჩემი აზრით არ არის კადრების დეფიციტი განათლების სისტემაში. არიან მაღალკვალიფიციური კადრები, ახალგაზრდები, რომლებსაც აქვთ უნარი იყვნენ მასწავლებლები. ვფიქრობ, ორი - სამი წელი საკმარისია სრულად ჩამოყალიბდნენ პროფესიონალ მასწავლებლებად, ამისათვის საჭიროა იმუშაონ გამოცდილ მასწავლებლებთან ერთად.

- რას ფიქრობთ ზაფხულში დაგეგმილი მასწავლებლების გამოცდების შესახებ ? რამდენად ეფექტურად მიგაჩნიათ გამოცდებით მასწავლებლის კომპეტენციის შეფასება ? 

-ვფიქრობ, გამოცდები უნდა იყოს ეტაპობრივად, უმჯობესია ფორმატი შეიცვალოს და რაც სჭირდება მასწავლებელს, ის საკითხები იყოს შესული საგამოცდო ტესტებში.  გამოცდებით მასწავლებლის კომპეტენციის შეფასება არ მიმაჩნია ეფექტურად. 

- როგორ აფასებთ დისტანციური სწავლების ხარისხს არა მარტო თქვენი სკოლის მაგალითზე, არამედ საერთოდ?       

- ჩემი აზრით დისტანციური სწავლების ხარისხი დაბალია.

- თქვენ როგორც დირექტორს, რა გასწავლათ პანდემიამ ? 

- პანდემიამ ძალიან დაგვაშორა ერთმანეთს. თუმცა, ერთმანეთის გაფრთხილება და დაცვა გვასწავლა.