მასწავლებლები საკუთარი პრაქტიკის სუსტ და ძლიერ მხარეებს შეაფასებენ
10-06-2022
ეროვნული სასწავლო გეგმის დანერგვის პროცესის შემაჯამებელი კონფერენცია (2022-2023) განათლებისა და მეცნიერების სამინისტროსა და საგანმანათლებლო რესურსცენტრების ერთობლივი ძალისხმევით, ივნისისა და ივლისის თვეში, ორ ეტაპად ჩატარდება - აღნიშნულის შესახებ ინფორმაციას, ზოგადი განათლების რეფორმის დეპარტამენტი ავრცელებს.
ღონისძიებაზე სასკოლო საზოგადობა გააზიარებს საკუთარ წარმატებულ გამოცდილებას, კერძოდ, მასწავლებლები ეროვნული სასწავლო გეგმის შედეგებთან მიმართებით, აღწერენ თავიანთი მოსწავლეების მიღწევებს, ახსნიან მათი წარმატებისა, თუ შეფერხების მიზეზებს, შეაფასებენ საკუთარი პედაგოგიკური პრაქტიკის ძლიერ და სუსტ მხარეებს. სკოლის ლიდერები კი წარადგენენ სასკოლო პროექტებს, რომლებმაც სასკოლო კულტურის განვითარებას შეუწყო ხელი.
კონფერენციის პირველი ეტაპი ივნისის თვის განმავლობაში მუნიციპალიტეტის დონეზე მიმდინარეობს, ხოლო 15-17 ივლისს ეროვნულ დონეზე ჩატარდება.
მიმდინარე სასწავლო წელს, პანდემიის მიუხედავად, საქართველოს სკოლებში აქტიურად ხორციელდებოდა ეროვნული სასწავლო გეგმის დანერგვა, სადაც გარდა ტრადიციული საშუალებებისა (გრიფირებული სახელმძღვანელო, ცენტრალიზებული მასობრივი ტრენინგები, გარე პარტნიორების ორგანიზებული მხარდამჭერი პროექტები), სკოლის ბაზაზე განხორციელდა სხვადასხვა აქტივობები (მუშაობა კომპლექსურ დავალებებზე, განმავითარებელ შეფასებაზე, პედაგოგიკური პრაქტიკის შესწავლაზე და სხვ.), რომლებიც სასკოლო სასწავლო გეგმების განვითარებას ემსახურებოდა. ამ აქტივობების განხორციელებაში სკოლებს ეხმარებოდა 24 მხარდამჭერი ჯგუფი, რომლებიც განაწილებული იყო საქართველოს ყველა მხარეში (თითოეული ჯგუფი დაკომპლექტებული იყო: საგნობრივი ექსპერტებით, ეროვნული სასწავლო გეგმის დანერგვის კოორდინატორებით, ლიდერობის, ტექნოლოგიებისა და ინკლუზიური განათლების სპეციალისტებით). სკოლებთან მათი თანამშრომლობის შედეგად განვითარდა ეროვნული სასწავლო გეგმის დანერგვის ინსტრუმენტები: საგანმანათლებლო და ელექტრონული რესურსები.
კონფერენციაზე ასევე განხილული იქნება მომდევნო სასწავლო წლისთვის დაგეგმილი ღონისძიებები.
სკოლების სიახლეები
