ზოგადსაგანმანათლებლო სკოლებს ახალი გრიფირებული სახელმძღვანელოების შერჩევის შესაძლებლობა მიმდინარე წლის 20 ივნისიდან 3 ივლისის ჩათვლით აქვთ. შერჩეული სახელმძღვანელოები სასწავლო წლის დაწყებამდე დაიბეჭდება და ყველა საჯარო სკოლაში დარიგდება.

გრიფირების პროცესში სხვადასხვა საგანზე სულ 47 განაცხადი იქნა წარმოდგენილი, მათგან IX კლასის საგნებში - 5, ხოლო X კლასის საგნებში - 42. მათგან 30-მა სახელმძღვანელომ მიიღო გრიფი.

გრიფირებული სახელმძღვანელოები საგნების მიხედვით იხილეთ ბმულზე: https://cutt.ly/fKlsHzH

აღსანიშნავია, რომ სახელმძღვანელოების რეცენზირებისთვის მიმდინარე წელს კონკურსის წესით შეირჩნენ რეცენზენტები, რომლებმაც სახელმძღვანელოების შეფასება შემდეგი კრიტერიუმებით განახორციელეს:

· ეროვნულ სასწავლო გეგმასთან შესაბამისობა,

· შინაარსობრივი, სტრუქტურული და ენობრივი გამართულობა,

· სამართლებრივ და ეთიკურ ნორმებთან შესაბამისობა

· მდგრადი განვითარების პრინციპებთან შესაბამისობა.

სახელმძღვანელოებს აფასებდნენ დამოუკიდებელი ექსპერტები. შემფასებელთა ჯგუფში წარმოდგენილნი იყვნენ როგორც პრაქტიკული გამოცდილების მქონე მასწავლებლები, ასევე აკადემიური წრის წარმომადგენლები - დარგის მეცნიერები, კურიკულუმის ექსპერტი, ფსიქოლოგი, ფილოლოგი და სპეციალისტი ადამიანის უფლებათა მიმართულებით.

საქართველოს განათლებისა და მეცნიერების სამინისტროს მიერ საგნობრივი რეცენზენტებისთვის, რეცენზირების პროცესის დაწყებამდე, ჩატარდა რამდენიმე დღიანი ტრენინგი. ასევე, ახალგაზრდა იურისტთა ასოციაციის ინიციატივით, რეცენზენტებს ჩაუტარდათ ტრენინგები შემდეგი მიმართულებით: ადამიანის უფლებები, შეზღუდული შესაძლებლობების მქონე პირთა უფლებები, დისკრიმინაცია, სტიგმა, თანასწორობა, უმცირესობების უფლებები, გენდერული ნიშნით დისკრიმინაცია, ბავშვთა უფლებები, ქალთა უფლებებიდა ა. შ.

გასული წლების მსგავსად, სახალხო დამცველის ინსტიტუტთან თანამშრომლობით, შეფასების პროცესში ჩართულები იყვნენ სპეციალისტები, რომლებიც სახელმძღვანელოებს აფასებდნენ სხვადასხვა მიმართულებით, კერძოდ, რამდენად თავისუფალია სახელმძღვანელო სტერეოტიპული დამოკიდებულებისგან, ეთნიკური, რელიგიური და სხვა ნიშნით დისკრიმინაციული ელემენტებისგან, რამდენად არის გათვალისწინებული მდგრადი განვითარების პრინციპები და სხვ.

პროცესის უფრო მეტად გამჭვირვალობისა და საზოგადოების ჩართულობის უზრუნველყოფის მიზნით, რეცენზირების პარალელურად, ყველა სახელმძღვანელოს მაკეტი (ანონიმური ეგზემპლარი) მიმდინარე წლის 3-30 მარტის (IX კლ) და 14 აპრილი-1-ელი მაისის (X კლ) ჩათვლით დაიდო საჯაროდ. ნებისმიერ დაინტერესებულ პირს ამ პერიოდში ჰქონდა სახელმძღვანელოების გაცნობისა და მათზე შენიშვნა/რეკომენდაციების წარმოდგენის შესაძლებლობა.

1. აფხაზური ენა და ლიტერატურა (VII-IX კლასები);

2. მშობლიური ენა და ლიტერატურა რუსული/სომხური/აზერბაიჯანული (VII-X კლასები);

3. ფიზიკური აღზრდა და სპორტი (IX-X კლასები).

1. სამოქალაქო განათლება (პროექტული სწავლება) X კლ;

2. მეორე უცხოური ენა - რუსული ენა (X კლასი).

ამ საგნებში მომავალ წელს განმეორებით გამოცხადდება კონკურსი უკვე XI კლასის სახელმძღვანელოებთან ერთად.

სახელმძღვანელოების შეფასების სისტემის შემდგომი გაუმჯობესების მიზნით, სამინისტრო იწყებს დასრულებული გრიფირების პროცესის ანალიზს ძლიერი და სუსტი მხარეების გამოსავლენად და მზადაა გამომცემლების, ავტორებისა და სხვა დაინტერესებული პირებისგან მიიღოს კონკრეტული წინადადებები, შენიშვნები და რეკომენდაციები.

იხილეთ: ახალი სახელმძღვანელოები საგნების მიხედვით 2022-2023 სასწავლო წლისთვის