სწავლების თანამედროვე მიდგომა, რომელიც უნივერსალური დიზაინის პრინციპებს ეფუძნება, ყველა მოსწავლისთვის სწავლის თანაბარ შესაძლებლობას ქმნის, მიუხედავად მათ შორის არსებული განსხვავებისა. მისი ძირითადი პრინციპია სწავლა-სწავლებისას მოხდეს ყველა მოსწავლისთვის რელევანტური სასწავლო მეთოდების, მასალის და შეფასების სისტემის გამოყენება. სწორედ ამიტომ სწავლების ამ მიდგომას „უნივერსალური“ ეწოდება.
უნივერსალური დიზაინის უპირატესობა იმაში მდგომარეობს, რომ ამ პრინციპების გათვალისწინებით დაგეგმილი სწავლის პროცესი შედეგის მომტანია ყველასთვის და არა მოსწავლეთა გარკვეული ჯგუფისთვის. სწავლა/სწავლებისას განსაკუთრებული ყურადღება ექცევა შემდეგ კომპონენტებს:
- როგორ და რა გზებით ხდება მოზარდისთვის ცოდნის გადაცემა, ინფორმაციის მიწოდება? ამ დროს აქცენტი კეთდება ინფორმაციის და შინაარსის წარდგენის მრავალფეროვან გზებზე, რათა ინფორმაციის აღქმა, გაგება და გადამუშავება ეფექტურად მოხდეს.
- როგორ და რა გზებით ხდება მოზარდის მხრიდან ცოდნის დემონსტრირება? ამ დროს აქცენტი კეთდება ცოდნის გადმოცემის, გამოხატვის და აქტივობის შესრულების მრავალფეროვან გზებზე.
უნივერსალური დიზაინის პრინციპების თანახმად, იმისათვის რომ სწავლის პროცესი წარმატებით განხორციელდეს მოსწავლისთვის ცხადად უნდა იყოს მოცემული შემდეგი სამი საკითხი:
- ინფორმაციის წარდგენის მრავალფეროვანი გზა: რას ვსწავლობ? რას ვხედავ, რა მესმის, რას ვკითხულობ?
- გამოხატვის მრავალფეროვანი გზა: როგორ ვსწავლობ? ცოდნის გადმოცემის, აქტივობის და გამოხატვის რა გზებს ვიყენებ?
- მოტივაციის (ჩართვის) მრავალფეროვანი გზა: რატომ ვსწავლობ? რა მნიშვნელობის მატარებელია ეს ცოდნა? როგორ გამოვიყენებ მას?
უნივერსალური დიზაინის პრინციპების გათვალისწინებით დაგეგმილი სასწავლო პროცესის უნიკალურობა მდგომარეობს იმაში, რომ სხვადასხვა რესურსების გამოყენებით მოსწავლისთვის მისაწვდომი ხდება სასწავლო მასალა, შინაარსი და მეთოდი.
