სასწავლო პროცესში მოსწავლისა და მასწავლებლის მხრიდან ურთიერთპატივისცემა უმნიშვნელოვანესი კომპონენტია. ხშირად ეს ფაქტორი სწავლის ხარისხსა და მოტივაციაზეც აისახება. პატივისცემას ადამიანები სხვადასხვაგვარად გამოხატავენ. ჩვენ დავინტერესდით ასლან შაინიძის სახელობის ბოლნისის მუნიციპალიტეტის სოფელ დისველის საჯარო სკოლის დირექტორის ჯანსულ შაინიძის აზრით და ვკითხეთ - როგორ გამოხატავენ ან როგორ უნდა გამოხატონ მოსწავლეებმა მასწავლებლებისადმი პატივისცემა.
მისი თქმით, ამ შემთხვევაში ბევრი რამე მასწავლებელზეა დამოკიდებული. ფიქრობს, რომ რასაც პედაგოგი გასცემს, იმავე უკუკავშირს მიიღებს.
„ამ შემთხვევაში, ყველაფერი მასწავლებელზეა დამოკიდებული, რადგან ის მოსწავლის ქცევას მართავს. მას როგორი დამოკიდებულებაც ექნება მოსწავლეების მიმართ, ისეთივე უკუკავშირს მიიღებს. პედაგოგმა მოსწავლის პატივისცემა რომ დაიმსახუროს, თვითონაც შესაბამისად უნდა მოიქცეს. შეიძლება ითქვას, რომ ამ პროცესში ისაა წარმმართველი ძალა. კლასში მოსწავლე ობიექტია, რომელზეც მასწავლებელი ზემოქმედებს და მისი დამოკიდებულება ბევრ რამეს განაპირობებს. პატივისცემა შეიძლება მიმართვის ფორმებშიც გამოიხატებოდეს“,- ამბობს ჯანსულ შაინიძე.
