მასწავლებელთა პრაქტიკული საქმიანობის შეფასების მონახაზი უკვე ცნობილია. მართალია, ჯერ დოკუმენტის საბოლოო ვერსია არ შემუშავებულა, თუმცა სამინისტრომ სტატუსის ამაღლებისთვის სავალდებულო საფეხურები მასწავლებლებს უკვე წარუდგინა.
დოკუმენტის თანახმად, გაუქმდა გარე დაკვირვება, თუმცა მნიშვნელოვანი დატვირთვა აქვს პროფესიულ საქაღალდეს, რომელიც პედაგოგმა სავალდებულო მასალებით უნდა შეავსოს.
პედაგოგთა მოსაზრებები გაიყო. მასწავლებელთა ნაწილი ფიქრობს, რომ დოკუმენტში წარმოდგენილი ინფორმაცია ბუნდოვანია, ნაწილი სიახლეს ისევ გარე დაკვირვების გავლას ამჯობინებს, ნაწილი კი მიღებული ინფორმაციით კმაყოფილია.
წამყვანი და მენტორი მასწავლებლის სტატუსის მსურველი ვალდებულია, პორტფოლიოში წარმოადგინოს საკუთარი საქმიანობის რეფლექსია და განხორციელებული აქტივობების მტკიცებულებები, რომლებიც ადასტურებს შესაბამისი კომპეტენციების ფლობას შემდეგი ოთხი მიმართულებით:
- სასწავლო პროცესის დაგეგმვა და წარმართვა;
- სკოლის განვითარებაზე ორიენტირებული კვლევებისა და პროექტების განხორციელება;
- განათლების სფეროში სიახლეების ძიება, პრაქტიკაში დანერგვა და გაზიარება;
- საკუთარ და კოლეგების პროფესიულ განვითარებაზე ზრუნვა.
ჩამოთვლილი ოთხი მიმართულებიდან გამომდინარე რა კომპეტენციას უნდა ფლობდნენ მენტორობის მსურველები და რა სახის ინფორმაციას უნდა შეიცავდეს მათი პორტფოლიო?
სასწავლო პროცესის დაგეგმვა და წარმართვა - კომპეტენცია:
შეუძლია გრძელვადიანი სასწავლო მიზნების შესაბამისი სასწავლო რესურსების შექმნა/განვითარება და გაზიარება.
პროფესიულ საქაღალდეში შესატანი მტკიცებულებები:
- მოსწავლეთა პროგრესის ამსახველი მასალა;
- საგნობრივი კურიკულუმის/მისი რომელიმე ნაწილის განხორციელებისა და განვითარების ამსახველი მასალა (კომპლექსური დავალება, თემატური მატრიცა).
- გრძელვადიანი სასწავლო მიზნების მისაღწევად შექმნილი სასწავლო რესურსები. რესურსების გამოყენების და გაზიარების დამადასტურებელი მტკიცებულებები.
სკოლისა განვითარებაზე ორიენტირებული კვლევებისა და პროექტების განხორციელება - კომპეტენცია:
შეუძლია გლობალური პროექტების, სხვადასხვა საერთაშორისო თუ უცხოური ორგანიზაციის გამოცდილების ინტეგრირება სასკოლო ცხოვრებაში სკოლის/თემის/რეგიონის საგანმანათლებლო საჭიროებებიდან და შესაძლებლობებიდან გამომდინარე.
პროფესიულ საქაღალდეში შესატანი მტკიცებულებები:
- სკოლის თემის საჭიროებებზე ორიენტირებული სასკოლო პროექტის განხორციელების დამადასტურებელი მასალა;
- პედაგოგიკური პრაქტიკის შესწავლისა ამსახველი მასალა; მასზე (პრაქტიკის შესწავლაზე) დაფუძნებით, კურიკულუმის განვითარების მიზნით განხორციელებული აქტივობების დამადასტურებელი მასალა.
- საუკეთესო პრაქტიკის დასანერგად და მოსწავლეთა შედეგების გასაუმჯობესებლად სხვა საგანმანათლებლო დაწესებულებებთან და ორგანიზაციებთან კომუნიკაციის დამადასტურებელი დოკუმენტები.
განათლების სფეროში სიახლეების ძიება, პრაქტიკაში დანერგვა და გაზიარება - კომპეტენცია:
- იცნობს თანამედროვე პროფესიულ ლიტერატურასა და საერთაშორისო საგანმანათლებლო კვლევებს. არსებულ ცოდნას ნერგავს სკოლის დონეზე და მიღებულ გამოცდილებას აზიარებს რეგიონული/ეროვნული მასშტაბით.
პროფესიულ საქაღალდეში შესატანი მტკიცებულებები:
ზოგადი განათლების სფეროში ეროვნულ და საერთაშორისო დონეზე მიმდინარე საგანმანათლებლო სიახლეებისა და პროფესიული ლიტერატურის გაცნობისა და ინოვაციების დანერგვის/განხორციელების დამადასტურებელი მასალა.
საკუთარი და კოლეგების პროფესიულ განვითარებაზე ზრუნვა - კომპეტენცია:
სკოლის სტრატეგიული დაგეგმვისა და მონიტორინგის განხორციელების პროცესში შეუძლია მასწავლებელთა პროფესიული განვითარების გზების იდენტიფიცირება რეგიონში არსებული რესურსის გამოყენებით.
პროფესიულ საქაღალდეში შესატანი მტკიცებულებები:
- სხვა მასწავლებლებთან თანამშრომლობით განხორციელებული პედაგოგიკური პრაქტიკის შესწავლის ამსახველი მასალები;
- პედაგოგიკური პრაქტიკის შესწავლისა ამსახველი მასალა; მასზე (პრაქტიკის შესწავლაზე) დაფუძნებით, კურიკულუმის განვითარების მიზნით განხორციელებული აქტივობების დამადასტურებელი მასალა.
