ცინარეთის საჯარო სკოლაში შიდა სასკოლო ღონისძიება - ,,ო, ენავ ჩემო, დედაო ენავ“ გაიმართა. 

ღონისძიებას პედაგოგი ნუნუ ცინარიძე ხელმძღვანელობდა. 

სკოლის აღსაზრდელებმა დედაენისადმი მიძღვნილი ლექსები და მშობლიური ენის მნიშვნელობის შესახებ ქართველი მწერლების მიერ დაწერილი ციტატები წაიკითხეს. 

ღონისძიებამდე მასწავლებელი აღსაზრდელებს 1978 წლის 14 აპრილის მოვლენებსა და დედა ენის მნიშვნელობაზე ესაუბრა. 

დედა ენის დღე საქართველოში 14 აპრილს აღინიშნება. 

1978 წლის 14 აპრილს საქართველოს მოსახლეობამ, ინტელიგენციის წარმომადგენლებთან ერთად, მასობრივი გამოსვლა მოაწყო და წინ აღუდგა საბჭოთა კავშირის გადაწყვეტილებას, საქართველოში ქართული ენის, როგორც სახელმწიფო ენის გაუქმების შესახებ.

დაძაბული ვითარების გამო, ოფიციალური მოსკოვი იძულებული გახდა, დაეთმო და კონსტიტუციაში ცვლილება აღარ შევიდა, ხოლო 14 აპრილი დედაენის დღედ გამოცხადდა.
 
იხილეთ ფოტოები