დირექტორობის მსურველთათვის სერტიფიცირების პირველი ეტაპი გამოცხადდა. რეგისტრაცია 4 დეკემბრის ჩათვლითაა შესაძლებელი. დაინტერესებულების ნაწილი ფიქრობს, რომ აღნიშნულ გამოცდასაც, ისევე როგორც მასწავლებელთა კომპეტენციის დამადასტურებელ გამოცდებს, „ნაეკი“ ატარებს.
ატარებს თუ არა დირექტორობის მსურველთა გამოცდას შეფასებისა და გამოცდების ეროვნული ცენტრი?
არა. დირექტორობის მსურველთა რეგისტრაციასა და ელექტრონულ ტესტირებას უზრუნველყოფს სსიპ განათლების მართვის საინფორმაციო სისტემა. სერტიფიცირების ეტაპისათვის რეგისტრაციის ვადაც სწორედ მართვის სისტემის უფროსის ინდივიდუალური ადმინისტრაციულ-სამართლებრივი აქტით განისაზღვრება.
რას მოიცავს სერტიფიცირების ეტაპი?
სერტიფიცირების ეტაპი შედგება ორი ნაწილისაგან, პირველი ნაწილი მოიცავს ტესტირებას, რომელიც ტარდება ელექტრონულად, მართვის სისტემის სათანადოდ შემუშავებული კომპიუტერული პროგრამის გამოყენებით. მეორე ნაწილი მოიცავს გასაუბრებას მინისტრის ინდივიდუალური ადმინისტრაციულ-სამართლებრივი აქტით შექმნილ კომისიასთან.
სად ჩატარდება გამოცდები?
რეგისტრაციის ვადის დასრულების შემდეგ სამინისტროს ვებგვერდზე ქვეყნდება ინფორმაცია რეგისტრირებულ დირექტორობის მსურველთა თაობაზე იმ საგამოცდო ცენტრის მითითებით, სადაც უნდა გამოცხადდეს დირექტორობის მსურველი.
საგამოცდო ცენტრი უნდა განთავსდეს მართვის სისტემის მიერ სპეციალურად მოწყობილ, შესაბამისი ტექნიკით აღჭურვილ შენობაში. შეიძლება ეს თავად „ემისის“ შენობაც იყოს.
როდის უნდა ველოდოთ დირექტორობის მსურველთა ტესტირებას?
კანონმდებლობის თანახმად, ტესტირების ჩატარება შესაძლებელია დირექტორობის მსურველთა რეგისტრაციის ვადის დასრულებიდან არაუადრეს 10 დღისა.
ტესტირების ჩატარების თარიღს, ადგილს, დროს და ხანგრძლივობას, მართვის სისტემის წარდგინებით, ინდივიდუალური ადმინისტრაციულ-სამართლებრივი აქტით ადგენს მინისტრი, რომელიც ქვეყნდება სამინისტროს ოფიციალურ ვებგვერდზე.
რა სახის დამადასტურებელ დოკუმენტს მიიღებს პირი, რომელიც სერტიფიცირების ეტაპებს წარმატებით გაივლის და დირექტორობის უფლებას მოიპოვებს?
დირექტორობის უფლების მოპოვება დასტურდება მართვის სისტემის მიერ გაცემული სერტიფიკატით.
იხილეთ ასევე: 2086 საჯარო სკოლიდან დირექტორი მხოლოდ 9 სკოლას ჰყავს - უახლესი სტატისტიკა
დეტალური ინსტრუქცია დირექტორობის მსურველთა სერტიფიცირებაზე რეგისტრაციის მსურველებითვის
