მასწავლებელს სასწავლო მასალის ახსნის შემდეგ ყოველთვის აინტერესებს, რა გაიგეს მოსწავლეებმა, რა დაამახსოვრდათ გაკვეთილიდან, თუმცა როდესაც კლასი მრავალრიცხოვანია, რთულია გაიგო, როგორ გაიაზრა საკითხი თითოეულმა მოსწავლემ.
გაკვეთილზე მიღებული ცოდნის დასადგენად მასწავლებელს ე.წ. გასასვლელი ბილეთები დაეხმარება. გასასვლელი ბილეთების გამოყენებით მასწავლებელს ეძლევა შესაძლებლობა, გაკვეთილის ბოლოს მიიღოს შემდეგი ინფორმაცია:
- როგორ გაიაზრეს მოსწავლეებმა მოსმენილი საკითხი;
- რა დამოკიდებულება და ინტერესები აქვთ მათ;
- მოსწავლეთა მოსაზრებები და შეხედულებები, თუ რას ფიქრობენ მოსმენილ თემაზე.
მასწავლებელს ასევე ეძლევა საშუალება, მოსწავლეთა საჭიროებებისა და ინტერესების გათვალისწინებით, მიღებული ინფორმაცია გამოიყენოს მომდევნო გაკვეთილის დასაგეგმად.
ბილეთების შევსებისას მოსწავლეები აჯამებენ და კიდევ ერთხელ იაზრებენ მოსმენილს. ეს ყოველივე კი ააქტიურებს მაღალი დონის სააზროვნო უნარებს, ზრდის მოსწავლეთა პასუხისმგებლობასა და საკლასო აქტივობებში მონაწილეობის ხარისხს.
როგორ შევადგინოთ გასასვლელი ბილეთები და რამდენი დრო უნდა დაეთმოს მასზე მუშაობას?
მოსწავლეებს გასასვლელი ბილეთები გაკვეთილის დასრულებამდე 5-10 წუთით ადრე უნდა დაურიგდეთ. მასში ღია კითხვები უნდა იყოს ჩამოწერილი, კითხვაზე პასუხის დასაწერად კი ადგილი გამოყოფილი. კითხვები შეიძლება იყოს შემდეგი:
- რა იყო დღევანდელი გაკვეთილის მიზანი?
- 3 მნიშვნელოვანი რამ, რაც გაკვეთილიდან დამამახსოვრდა...
- რაში დამეხმარება გაკვეთილზე მიღებული ცოდნა რეალურ ცხოვრებაში?
