სკოლებში ჯანსაღი, პოზიტიური და უსაფრთხო გარემო უნდა იყოს, თუმცა ამის მიღწევა შეუძლებელია, თუ წესრიგზე მასწავლებლებთან ერთად თავად მოსწავლეებიც არ იზრუნებენ.
თითოეულ სკოლაში ბავშვების უფლებები დაცული უნდა იყოს, თუმცა ამასთან, მოსწავლეებს თავიანთი ვალდებულებებიც უნდა ჰქონდეთ გაცნობიერებული.
სკოლებში წესრიგი შინაგანაწესით რეგულირდება. შინაგანაწესი კი უნდა ეფუძნებოდეს მოსწავლეთა ქცევის კოდექსს.
კანონის თანახმად მოსწავლეებს ეკრძალებათ:
- გაკვეთილზე დაგვიანება, ასევე გაკვეთილზე სასწავლო პროცესისათვის აუცილებელი ნივთების გარეშე გამოცხადება.
- საკუთარი აზრების და შეხედულებების გამოხატვა ისე, რომ სხვას შეულახონ უფლებები.
- გაკვეთილზე მობილური ტელეფონის ან სხვა ტექნიკური საშუალებების გამოყენება სასწავლო პროცესის დროს, არასასწავლო მიზნით.
- მასწავლებლის და სხვა მოსწავლეების ხელის შეშლა სასწავლო პროცესის მიმდინარეობისას.
- სხვა მოსწავლის ნამუშევრის მითვისება.
- რელიგიური და პოლიტიკური პროპაგანდა.
- გაკვეთილიდან გასვლა მასწავლებლის ნებართვის გარეშე.
- სხვისი ნივთების ან სკოლის ქონების დაზიანება.
- აკრძალული ნივთების სკოლაში ტარება.
- სკოლაში შეუფერებელი სამოსით გამოცხადება.
ჩამოთვლილის გარდა, ასევე აუცილებელია მოსწავლემ სკოლაში და მის მიმდებარე ტერიტორიაზე დაიცვას სისუფთავე.
შეგახსენებთ, რომ თუ მოსწავლე არღვევს წესებს, ამის გამო სკოლის შინაგანაწესში შეიძლება გათვალისწინებული იყოს მოსწავლის გაფრთხილება, მკაცრი გაფრთხილება, გაკვეთილიდან გაძევება, სკოლიდან დროებით დათხოვნა, მოსწავლისთვის სკოლისათვის სასარგებლო საქმიანობის დაკისრება და სხვა დისციპლინური სახდელები.
