კვლევა მასწავლებლის საქმიანობის შემადგენელი ნაწილია. პედაგოგი თავის პრაქტიკულ საქმიანობაში მუდმივად კვლევა-ძიების პროცესშია, საკვლევი საკითხი კი უამრავი შეიძლება იყოს.
მასწავლებელი სანამ უშუალოდ კვლევის პროცესზე გადავა, იქამდე უნდა განსაზღვროს, რისი გარკვევა სურს? მისი მიზანი კვლევით პრობლემის მიზეზის დადგენაა თუ მისი მოგვარების გზის აღმოჩენა?
მასწავლებელმა პრაქტიკის კვლევა შესაძლებელია განახორციელოს სამი ძირითდი მიზნით: არსებული პრაქტიკის შესწავლა (მაგ.:რა განაპირობებს მოსწავლეების დაბალ შედეგებს?), პრობლემის მოგვარება (მაგ,: რა შეიძლება გაკეთდეს მოსწავლეებში დისციპლინის პრობლემების მოსაგვარებლად?), სასურველი ცვლილების განხორციელება (სასარგებლოა თუ არა ჯგუფური მუშაობა დიფერენცირებული სწავლების თვალსაზრისით?)
კვლევის ფოკუსის განსაზღვრის შემდეგ სასურველია სამოქმედო გეგმის შემუშავება. მასწავლებლებისთვის შედგენილი გზამკვლევის თანახმად, კვლევის დაგეგმვა პედაგოგებს დაეხმარება, თავიდან აიცილონ უსარგებლო საქმიანობა.
მასწავლებელთა პროფესიული განვითარების ეროვნული ცენტრის მიერ შემუშავებულ სახელმძღვანელოში განმარტებულია, რომ კვლევის დაგეგმვის ეტაპზე მასწავლებლებს დაეხმარება შემდეგ შეკითხვები:
- რა სახის ლიტერატურას უნდა გავეცნო ჩემ მიერ შერჩეული საკითხის შესახებ საბაზო ინფორმაციის მოპოვების მიზნით?
- რა მინდა, რომ გავიგო კვლევის შედეგად?
- რატომ მინდა, რომ გამოვიკვლიო ეს საკითხი?
- ვინ შეიძლება დამეხმაროს ამ საკითხზე ცოდნისა და კომპეტენციის გაღრმავებაში?
- მონაცემთა რომელი წყაროები შეიძლება გამოვიყენო სასურველი ინფორმაციის მოპოვების მიზნით?
- ვისგან შეიძლება მოვიპოვო მონაცემები – მოსწავლეებისგან? მასწავლებლებისგან? მშობლებისგან? ადმინისტრაციისგან?
- ვინ შეიძლება დამეხმაროს ჩემ მიერ მონაცემთა მოპოვებისათვის საჭირო ინსტრუმენტების შექმნაში/გაუმჯობესებაში?
- ძირითადად რამდენ საქმიანობას განვახორციელებ კვლევის ფარგლებში?
- რა დრო დამჭირდება ამისთვის?
- ვინ იქნება პასუხისმგებელი თითოეულ საქმიანობაზე (იმ შემთხვევაში, თუ კვლევა ერთობლივად ხორციელდება მასწავლებლების ჯგუფის მიერ).
ექსპერტები მიუთითებენ, რომ კვლევის ფოკუსის შესახებ საბაზო ინფორმაციის მოძიებისთვის მაწავლებლებმა შეიძლება გამოიყენონ ისეთი სტრატეგიები, როგორებიცაა პროფესიული ლიტერატურისა და კოლეგების გამოცდილების გაცნობა.
