სკოლების გადაწყვეტილებით, საბაზო და საშუალო საფეხურზე წლიური გამოცდები ტარდება რაც იმას ნიშნავს, რომ შესაძლოა, წლიური გამოცდის ქულამ მოსწავლეთა წლიური შეფასებაც შეცვალოს.
მოსწავლეთა წლიურ შეფასებას გამოცდის ქულა იმ შემთხვევაში შეცვლის, თუ სკოლას განსაზღვრული აქვს, რომ გამოცდის შეფასებას გავლენა ექნება საგნის წლიურ ქულაზე.
გამოცდები შესაძლოა, ყველა სკოლაში არ ჩატარდეს, რადგან საბაზო და საშუალო საფეხურზე წლის ბოლოს გამოცდის დანიშვნის საკითხს თავად სკოლა წყვეტს.
როგორ გამოითვლება წლიური ქულა იმ შემთხვევაში, თუ საბოლოო შეფასებაზე გამოცდების შედეგებიც აისახება?
ეროვნული სასწავლო გეგმის მიხედვით, თუ სასკოლო სასწავლო გეგმა ითვალისწინებს წლიური გამოცდის ჩატარებას და განსაზღვრულია, რომ ამ გამოცდის ქულაც აისახება საგნის წლიურ ქულაზე, მაშინ საგნის წლიური ქულა სამი (ორი - საგნის სემესტრული და ერთი - გამოცდის) ქულის საშუალო არითმეტიკულია (დამრგვალებული მთელის სიზუსტით).
ცნობისთვის, წლიურ გამოცდაზე დაუშვებელია მოსწავლეებისთვის არჩევითპასუხიანი ტესტის შეთავაზება. მის ნაცვლად მოსწავლეთა ცოდნა შემაჯამებელი დავალების მსგავსი კომპლექსური კონტექსტის მქონე დავალებებით უნდა შემოწმდეს.
