განათლების ხარისხის განვითარების ეროვნული ცენტრის 2023 წლის 14 სექტემბრის N 1154500 ბრძანებით ცვლილება განხორციელდა „პროფესიულ საგანმანათლებლო საქმიანობასთან დაკავშირებული საავტორიზაციო განაცხადის ფორმებისა და პროფესიული საგანმანათლებლო დაწესებულების ავტორიზაციის სტატუსის მაძიებლის თვითშეფასების ფორმის დამტკიცების შესახებ" სსიპ - განათლების ხარისხის განვითარების ეროვნული ცენტრის დირექტორის 2020 წლის 20 თებერვლის №221888 ბრძანებაში და განახლებული სახით ჩამოყალიბდა:
1. პროფესიულ სტუდენტთა ადგილების რაოდენობის გაზრდის შესახებ განაცხადის ფორმა;
2. პროფესიული საგანმანათლებლო პროგრამის დამატების შესახებ განაცხადის ფორმა;
3. პროფესიული საგანმანათლებლო პროგრამის განხორციელების ადგილის/ფართის ცვლილების განაცხადის ფორმა;
4. საშუალო პროფესიულ საგანმანათლებლო პროგრამაში ზოგადი განათლების საშუალო საფეხურის სწავლის შედეგების ინტეგრირების უფლების მოპოვების შესახებ განაცხადის ფორმა.
ასევე, დამატებით დამტკიცდა პროფესიული საგანმანათლებლო პროგრამების განმახორციელებელი დაწესებულებების რეავტორიზაციის/ყოველწლიური თვითშეფასების ანგარიშის ფორმა.
პირველადი ავტორიზაციის მიზნებისათვის, ძალაში დარჩა პროფესიული საგანმანათლებლო დაწესებულების ავტორიზაციის სტატუსის მაძიებლის თვითშეფასების ფორმა.
2023 წლის 14 სექტემბრის N 1154500 ბრძანების ძალაში შესვლამდე დაწყებული შესაბამისი ადმინისტრაციული წარმოება სრულდება ცენტრის დირექტორის 2020 წლის 20 თებერვლის №221888 ბრძანების პირველი პუნქტით დამტკიცებული ფორმების მიხედვით.
ასევე, სსიპ - განათლების ხარისხის განვითარების ეროვნული ცენტრის დირექტორის 2023 წლის 14 სექტემბრის N 1154523 ბრძანებით განახლებული სახით დამტკიცდა პროფესიული საგანმანათლებლო დაწესებულებების ავტორიზაციის ექსპერტთა ჯგუფის დასკვნის ფორმები:
1. პროფესიული საგანმანათლებლო პროგრამების განმახორციელებელი დაწესებულების მიერ პროფესიულ სტუდენტთა ადგილების რაოდენობის გაზრდის, პროფესიული საგანმანათლებლო პროგრამის განხორციელების ადგილის/ფართის ცვლილების, საშუალო პროფესიულ საგანმანათლებლო პროგრამაში ზოგადი განათლების საშუალო საფეხურის სწავლის შედეგების ინტეგრირების, ავტორიზაციის პირობების შესრულების შემოწმების შესახებ ადმინისტრაციული წარმოების ფარგლებში ავტორიზაციის ექსპერტთა ჯგუფის დასკვნის ფორმა;
2. პროფესიული საგანმანათლებლო პროგრამის დამატების შესახებ ავტორიზაციის ექსპერტთა ჯგუფის დასკვნის ფორმა;
3. პროფესიული საგანმანათლებლო დაწესებულების ავტორიზაციის სტატუსის მოპოვების თაობაზე ადმინისტრაციული წარმოების ფარგლებში ავტორიზაციის ექსპერტთა ჯგუფის დასკვნის ფორმა.
2023 წლის 14 სექტემბრის N 1154523 ბრძანების ძალაში შესვლამდე დაწყებული შესაბამისი ადმინისტრაციული წარმოება სრულდება ცენტრის დირექტორის 2021 წლის 24 თებერვლის №158684 ბრძანების პირველი პუნქტით დამტკიცებული ფორმის მიხედვით.
განახლებული განაცხადის ფორმები და ექსპერტთა დასკვნის ფორმები შეგიძლიათ იხილოთ შემდეგ ბმულზე - https://eqe.ge/ka/page/static/477/formebi;
